Բաժանորդագրվեք araratnews-ի տելեգրամ ալիքին։
Չինաստանի ֆինանսների նախարարությունն ուրբաթ հայտարարել է, որ ապրիլի 10-ից ԱՄՆ-ից ներկրվող բոլոր ապրանքների համար կսահմանի 34% մաքսատուրք՝ այս շաբաթվա սկզբին ԱՄՆ նախագահ Դոնալդ Թրամփի վարչակազմի սահմանած մաքսատուրքերին ի պատասխան, գրում է CNBC-ն:
Միաժամանակ Պեկինը կոչ է անում Միացյալ Նահանգներին անհապաղ չեղարկել իր միակողմանի մաքսային միջոցառումները և առևտրային տարաձայնությունները լուծել խորհրդակցությունների միջոցով՝ հավասար, հարգալից և փոխշահավետ ձևով:
Չինաստանի նկատմամբ լրացուցիչ պատասխան տուրքեր սահմանելով՝ ԱՄՆ-ի ընդհանուր մաքսատուրքերը հասնում են 54%-ի: Ըստ Պեկինի՝ դա «միջազգային առևտրի կանոնների հետ անհամատեղելի» է, «լրջորեն» խաթարում է Չինաստանի շահերը, ինչպես նաև վտանգում «համաշխարհային տնտեսական զարգացումը, արտադրության ու մատակարարման շղթայի կայունությունը»: Չինաստանը հայց է ներկայացրել Առևտրի համաշխարհային կազմակերպություն՝ ամերիկյան մաքսատուրքերի պատճառով:
Չինաստանը նաև 11 ամերիկյան ընկերության ներառել է «անվստահելի կազմակերպությունների ցանկում», որոնք Պեկինի կարծիքով խախտել են շուկայի կանոնները կամ պայմանագրային պարտավորությունները: Չինաստանի առևտրի նախարարությունը հայտնել է, որ իր արտահանման վերահսկման ցուցակում է հայտնվել ԱՄՆ 16 կազմակերպություն և նշել, որ արտահանման հսկողություն է իրականացնելու հազվագյուտ մետաղների հետ կապված յոթ տեսակի ապրանքների նկատմամբ: