Բաժանորդագրվեք araratnews-ի տելեգրամ ալիքին։
Օրեր առաջ Հայոց ցեղասպանության թանգարան-ինստիտուտը որպես նվիրատվություն ստացել է նշանավոր հայդուկ Գևորգ Չաուշի այրու՝ Հեղինե (Եղսո) Չաուշի բնօրինակ լուսանկարը։
Այս մասին հայտնել է թանգարան-ինստիտուտը:
Նվիրատուն՝ Մուրադ Ուչաները, լուսանկարը պատահաբար հայտնաբերել է 2005 թ․ Այնթապի պատմական թաղամասերից մեկում՝ մի հին տան վերականգնման աշխատանքների ժամանակ պատի թաքստոցից։
«Լուսանկարում Հեղինե Չաուշի մի ձեռքում ատրճանակ է, մյուսում՝ հրացան, կրծքին և գոտկատեղին կապված են փամփշտակալներ։ Լուսանկարն արվել է ամուսնու մահից հետո՝ 1910 թ․ Այնթապում, «M. H. Halladjian» լուսանկարչատանը։ Լուսանկարի դարձերեսին ձեռագիր ընծայագիր կա․ «Հանգուցեալ հերոս Գէորգ Չաուշի տիկին այրի Հեղինէ։ Մեր յիշատակի նուէրը [անընթեռնելի բառ] Տիար Յովհաննէս և տիկին Փիդանեան․ 21 յուլիս, 1910, Հ․Յ․Դ․, Այնթապ»։
Գևորգի և Հեղինեի սիրո պատմությունն անձնուրաց սիրո դրսևորում է. 1905 թ․, չնայած բազմաթիվ խոչընդոտների, ֆիդայական օրենքներին հակառակ նրանք ամուսնանում են։ Ամուսնու զոհվելուց հետո Հեղինեն և նրանց միակ որդին հետապնդվում են թուրքական իշխանությունների կողմից՝ անցնելով լուրջ փորձությունների միջով»,- ասված է հաղորդագրության մեջ։
Լուսանկարի վերաբերյալ 2013 թ. Վահե Հաբեշեանը (1990-1996 թթ. «The Armenian Weekly» շաբաթաթերթի խմբագիր) հոդված է հրատարակել միևնույն շաբաթաթերթում։
Հոդվածը սույն հղմամբ՝ https://armenianweekly.com/2013/12/11/the-woman-in-the-wall/: