Բաժանորդագրվեք araratnews-ի տելեգրամ ալիքին։
Սեպտեմբերի 10-ին Ազգային ժողովի նիստի ընթացքում կրթության, գիտության, մշակույթի և սպորտի նախարար Ժաննա Անդրեասյանը ներկայացրեց «Լեզվի մասին» օրենքում փոփոխություններ կատարելու նախագիծը՝ ընդգծելով լեզվական քաղաքականության համակարգման կարևորությունը։
Ըստ նախարարի՝ լեզվի ոլորտում անհրաժեշտ են ավելի մեծածավալ և հայեցակարգային փոփոխություններ, որոնց ուղղությամբ նախարարությունը համագործակցել է Լեզվի կոմիտեի հետ։ Արդյունքում մշակվել է լեզվական քաղաքականության նոր հայեցակարգ, որը մոտ ժամանակներում կներկայացվի հանրային քննարկման։
«Սակայն այս փաթեթով մենք փորձել ենք կարգավորել այն հարցերը, որոնք ունեն առաջնային անհրաժեշտություն։ Խոսքը մասնավորապես եզրույթների կանոնակարգման գործընթացի մասին է»,- նշեց Ժաննա Անդրեասյանը։
«Առաջարկում ենք լիազորող նորմ սահմանել՝ պետական փաստաթղթաշրջանառության մեջ կիրառվող, նաև մասնավորապես եզրույթների կանոնակարգման գործընթացի համար համապատասխան մասնագիտական հանձնաժողովի ձևավորման և այս գործընթացի կազմակերպման միջոցով: Սա ունի շատ պրակտիկ և կիրառական նշանակություն:
Այս ընթացքում բազում են եղել իրավիճակները, երբ մեր երկրի համար կարևորագույն գործընթացներում մենք հասկացությունների սահմանման և այս հասկացությունների միատեսակ օգտագործման կարևորագույն խնդիր ենք ունեցել, որը կապված է ամենատարբեր բնագավառների հետ, և այդ իմաստով կարծում ենք, որ այս նախագիծն ունի առաջնահերթ հրատապություն:
Հենց դա է պատճառը, որ հարկ ենք համարել առանձնացնել ամբողջական լեզվական քաղաքականության հայեցակարգը դրանից բխող օրենսդրական փոփոխությունների փաթեթից և ներկայացնել առանձին, որպեսզի կարողանանք ավելի արագ կարգավորումներ տալ կիրառական նշանակություն ունեցող հարցերին»,- ասաց նախարարը:
Պատգամավոր Գեղամ Նազարյանը լեզվին առնչվող այլ հարցից հետաքրքրվեց, այն է՝ պաշտոնական հանդիպումների ժամանակ հայերենը ոտնահարվում է: Նախարարն արձագանքեց՝ «Լեզվի մասին» օրենքը կարգավորում է նաև համաժամանակյա մոտեցմամբ այլ լեզվով խոսելը, և սա օրենքի շրջանակում է, բայց եթե կա որևէ դրսևորում, որն օրենսդրական կարգավորումներից դուրս է, նման հարցերով դիմում են նաև Լեզվի կոմիտե, և վարույթները քննվում են:
«Մեզնից յուրաքանչյուրը պետք է հայերենի նկատմամբ ունենա առանձնահատուկ վերաբերմունք, և ես շատ կարևորում եմ, որպեսզի սրանք ոչ միայն բառեր լինեն, այլև լինի գործնականում: Սա ասելով՝ նկատի ունեմ շատ պրակտիկ հարցեր, ինչպես օրինակ՝ դասագրքերի լեզուն, բազմաթիվ տեքստեր, որոնք հայերեն բառերով և տառերով են, բայց հայերեն չեն: Այնպես որ, խնդիրները բազմազան են»,- ասաց նա: