Բաժանորդագրվեք araratnews-ի տելեգրամ ալիքին։
Իրանի արտգործնախարարն արձագանքել է Դոնալդ Թրամփի հայտարարությանը, որ Միացյալ Նահանգները տնտեսական պատերազմ է սկսում Իսլամական Հանրապետության դեմ:
Աբբաս Արաղչին անհաջող է որակել ԱՄՆ նախագահի վարած քաղաքականությունը՝ նշելով, որ այն կհանգնեցնի նոր պարտությունների և իրանցիների շրջանում թշնամանքի աճի։ Արաղչիի խոսքով՝ ԱՄՆ-ի տնտեսական ահաբեկչությունը սպառնում է համաշխարհային տնտեսությանը և պետությունների ինքնիշխանությանը:
Ավելի վաղ Սպիտակ տան ղեկավարը նշել էր, որ հնարավորություն էր տվել Իսլամական Հանրապետությանը գնալ գործարքի, սակայն Թեհրանը չի օգտվել դրանից:
«Սա կլինի աննախադեպ մեկուսացում: Նրանց նավատորմը, ռազմաօդային ուժերը ոչնչացվել են, գործարանները վերածվել են ավերակների, երկիրը կախված է թելից»,- գրել էր Սպիտակ տան ղեկավարը Truth Social-ի էջում:
Թրամփը հավելել էր՝ այժմ ցանկացած երկիր, որը որևէ կերպ օգնություն է ցուցաբերում Իրանին, ևս կբախվի տնտեսական հետևանքների: Նա կոչ էր արել դաշնակիցներին՝ կանգնել ԱՄՆ-ի կողքին:
Միևնույն ժամանակ, նա չի բացառել, որ Թեհրանի հետ բանակցությունները կարող են վերսկսվել: