Սույն թվականի օգոստոսի 14-ին կայացավ «Հանուն Հանրապետության» ԺՊԴ կուսակցության արտահերթ համագումարը։ Կուսակցության ՂՄ ներկայացուցիչ Արման Բաբաջանյանը ներկայացրեց դեռևս 2020թ․ մայիսին սկզբնավորված «Հանուն Հանրապետության» քաղաքական նախաձեռնության, ապա 2020թ. սեպտեմբերի 21-ին հիմնադրված «Հանուն Հանրապետության ժողովրդավարության պաշտպանների դաշինք» կուսակցության անցած 11 ամիսների գործունեությունը՝ առավելապես կենտրոնանալով ԱԺ արտահերթ ընտրություններին կուսակցության մասնակցության և դրա արդյունքներից բխող իրողությունների վրա։

Կուսակցության հիմնումից ընդամենը 7 օր անց մեկնարկած 44-օրյա աղետալի պատերազմը, դրան հաջորդած ներքաղաքական իրադարձությունները, որոնք ուղեկցվում էին մեդիահարձակումներով, անկառավարելի կեղծ տեղեկատվական հոսքերով, արտաքին քաղաքական և անվտանգային մարտահրավերները, Արցախի կարգավիճակի և Հայաստանի ներքաղաքական կյանքի վրա ազդող սահմանային և արտաքին այլ սպառանլիքները, վերջապես արտահերթ խորհրդարանական ընտրությունները իսկական քննությունն էին նորաստեղծ քաղաքական կուսակցության համար։

Ազգային ժողովում ժողովրդավարական այլընտրանքային բևեռի ներկայությունը չափազանց կարևոր համարելով կուսակցությունն ամիսներ շարունակ անհաջող բանակցել է գաղափարակից քաղաքական գրեթե բոլոր ուժերի հետ։

Արտահերթ համագումարը արձանագրեց, որ երկրի ժողովրդավարությունն ու նրա պաշտպանությունը կուսակցության համար մնում է առաջնահերթություն և այդ նպատակով կուսակցությունը որոշել է ակտիվորեն մասնակցել առաջիկա ՏԻՄ ընտրություններին։

Կուսակցության առավել արդյունավետ գործունեության համար համագումարը հաստատել է կուսակցության կանոնադրական փոփոխությունները։

Ղեկավար մարմնի ներկայացուցիչ է ընտրվել Արման Բաբաջանյանը։ Կանոնադրական փոփոխությունների համաձայն կուսակցության ղեկավար մարմնի ներկայացուցիչն այսուհետ հանդես է կգա որպես կուսակցության նախագահ։

Համաձայն կուսակցության նոր կանոնադրության՝ կուսակցության ղեկավար մարմինը այսուհետ կոչվելու է Քաղաքական խորհուրդ: Քաղաքական խորհրդի անդամ են ընտրվել՝

Արման Բաբաջանյանը,

Ռուբեն Մեհրաբյանը,

Արշակ Սարգսյանը,

Լուսինե Հակոբյանը,

Վահագն Մարտիրոսյանը,

Սարգիս Գրիգորյանը,

Առնոլդ Բլեյանը,

Վիգեն Մովսիսյանը,

Արթուր Բարսեղյանը,

Միհրան Հակոբյանը,

Գարեգին Ղազարյանը,

Նոնա Համբարձումյանը,

Արտաշես Խալաթյանը։

Վերահսկիչ հանձնաժողովի անդամ են ընտրվել՝

Լևոն Խաչատրյանը,

Տիգրան Թոթոլյանը,

Անի Միրզոյանը։

Հավարտ համագումարի կուսակցության Քաղաքական խորհուրդը գումարել է առաջին նիստը, ստանձնելով համագումարի կողմից իրեն տրված պարտականությունները։

«Հանուն Հանրապետության» ԺՊԴ կուսակցության

Մամուլի ծառայություն

 

 

 

508