SHAMSHYAN.com-ը ներկայացնում է բացառիկ տեսանյութ՝ ինչպես է երեկ՝ դեկտեմբերի 26-ին, Երևանում տեղի ունեցել խոշոր ու շղթայական ավտովթարը, երբ Mercedes-ը Աբովյան պուրակից դեպի Սարալանջի հին ճանապարհով ընթանալիս դառնում է ավտովթարի հեղինակ, ինչի հետևանքով վնասվում են մի քանի ավտոմեքենաներ, 2 հոգի էլ տեղափոխվում են թիվ 1 համալսարանական հիվանդանոց։
Ինչպես ավելի վաղ դեպի վայրից հայտնել էր ֆոտոլրագրողը, դեկտեմբերի 26-ին խոշոր ու շղթայական ավտովթար էր տեղի ունեցել Երևանում: Ժամը 13:50-ի սահմաններում Սարալանջի հին ճանապարհից դեպի Տերյան փողոց ճանապարհահատվածում բախվել էին 29-ամյա Վարդան Պողոսանի վարած Honda Accord մակնիշի, 24-ամյա Դավիթ Միսակյանի վարած Hyundai Elantra մակնիշի, 33-ամյա Աշոտ Աշուղաթոյանի վարած Hyundai Accent մակնիշի և 31-ամյա Գևորգ Խաչատրյանի վարած Mercedes E320 մակնիշի ավտոմեքենաները:
Վթարի հետևանքով 2 հոգի, որոնց առաջինը օգնության էին հասել վթարված ավտոմեքենաների վարորդները և օպերատիվորեն ժամանած Արտակարգ իրավիճակների նախարարության փրկարար ծառայության Երևանի թիվ 8 հրշեջ-փրկարարական ջոկատի փրկարարներն ու Երևանի 103 շտապօգնության բժիշկների հերթապահ խումբը, տեղափոխվել էին թիվ 1 համալսարանական հիվանդանոց: Օպերատիվորեն ժամանել էին նաև ՀՀ ոստիկանության պարեկային ծառայության Երևանի գնդի 1-ին գումարտակի 1-ին վաշտի պարեկները ՝ գումարտակի հրամանատար Արամ Դադոյանի, վաշտի հրամանատար Հարություն Գրիգորյանի գլխավորությամբ:
Տարածքը սահմանազատել և տեղում ուժեղացված ծառայություն էին կատարել պարեկներ Դավիթ Ղազարյանն ու Հայկ Ղազարյանը, որպեսզի հետաքրքրասեր վարորդները մեքենաները չկայանեին և խցանում տեղի չունենար, ինչը նրանց հաջողվել էր: Վթարի մասին պարեկային ծառայության Երևանի գնդից տեղեկությունը փոխանցել էին պարեկային ծառայության Երևան քաղաքի գնդի ճանապարհատրանսպորտային պատահարների գործերով հետաքննության և վարչական վարույթի իրականացման բաժանմունք, որտեղից ժամանել էր հերթապահ խումբը՝ բաժանմունքի պետ Գրիգոր Ավետիսյանի, ավագ հետաքննիչ Գրիգոր Կիրակոսյանի գլխավորությամբ:
Փաստի առթիվ Գ. Կիրակոսյանի կողմից նյութեր էին նախապատրաստվում: