Լոռու մարզպետ Արամ Խաչատրյանն այսօր շրջայցով Վանաձոր քաղաքի այն թաղամասերում է եղել, որտեղ ՀՀ կառավարության որոշմամբ, Լոռու մարզպետարանին հատկացված մարզի հրատապ խնդիրների լուծման ծրագրի միջոցներով, իրականացվել են շենքերի վերելակների նորացման և նորոգման աշխատանքներ:

Մարզի ղեկավարը Լոռու մարզպետարանի քաղաքաշինության վարչության պետ Դավիթ Մանուչարյանի, Վանաձորի համայնքապետարանի աշխատակազմի քարտուղարի պաշտոնակատար Դավիթ Հակոբյանի, մարզպետարանի, համայնքապետարանի և շինաշխատանքները կատարող ընկերության պատասխանատու պաշտոնյաների հետ հետևել է աշխատանքներին և տեղում քննարկել ընթացիկ խնդիրները:

Ծրագրով նախատեսված էր վերելակների նորոգումն ավարտին հասցնել փետրվար ամսին, սակայն աշխատանքներն ավարտվել են սահմանված ժամկետից շուտ և  շահագործման կհանձնվեն մոտ օրերս։

Հրատապ ծրագրի շրջանակներում Վանաձորում վերանորոգվել են Ռուսթավի 8, Երևանյան խճուղի 147/2, Տիգրան-Մեծի 44, Նարեկացի 3Ա շենքերի վերելակները, որոնց նորոգման համար հատկացվել է 12 միլիոն դրամ։

Մարզի ղեկավարը բնակիչներին վստահեցրել է, որ գործընթացը շարունակական է լինելու:

Մարզպետը  պատասխանատու անձանց հանձնարարել է անմիջական ուշադրության տակ պահել մարզում իրականացվող ծրագրի ընթացքը:

Նշենք, որ Լոռու մարզին հատկացվել է 140 մլն դրամ մարզի մի շարք համայնքներում առաջնային կարևորության ծրագրեր իրականացնելու համար: Հատկացված միջոցներով մարզում նորոգվել են դպրոցներ, մշակութային օջախներ, բակեր, պուրակներ, խաղահրապարակներ, վերելակներ և այլն: