Թուրքիան կվավերացնի Շվեդիայի և Ֆինլանդիայի անդամակցությունը ՆԱՏՕ-ին միայն այդ երկրների ստանձնած պարտավորությունների կատարումից հետո, ինչը դեռ տեղի չի ունեցել։ Այս մասին երեքշաբթի լրագրողներին հայտարարել է Թուրքիայի ազգային պաշտպանության նախարար Հուլուսի Աքարը։
«Կան Շվեդիայի և Ֆինլանդիայի կողմից ստորագրված պարտավորություններ: Մենք ընդգծում ենք, որ այդ պարտավորությունները պետք է կատարվեն: Մենք ընդգծում ենք, որ այս հուշագիրը ոչ թե վերջն է, այլ սկիզբը: Այս պարտավորությունները կատարելուց հետո խորհրդարանը կկայացնի իր որոշումը։ Մենք ուշադիր հետևում ենք իրավիճակին Շվեդիայում և Ֆինլանդիայում։ Ցավով նշում ենք, որ այս երկրներում դեռ շարունակվում են սադրիչ գործողությունները։ Մենք ակնկալում ենք, որ և՛ Շվեդիան, և՛ Ֆինլանդիան կոնկրետ քայլեր կձեռնարկեն»,- ընդգծել է նա։
Դեկտեմբերի 5-ին Ֆինլանդիայի կառավարությունը ՆԱՏՕ-ին անդամակցելու մասին օրինագիծ է ներկայացրել երկրի խորհրդարան։ Հուլիսի սկզբին Ֆինլանդիայի և Շվեդիայի արտգործնախարարները, ինչպես նաև Հյուսիսատլանտյան դաշինքի անդամ 30 երկրների դեսպանները դաշինքի կենտրոնակայանում պաշտոնական արարողության ժամանակ ստորագրեցին արձանագրություններ ՆԱՏՕ-ին այս երկու պետությունների անդամակցության վերաբերյալ։ Հելսինկին և Ստոկհոլմը կմիանան ՆԱՏՕ-ին, երբ փաստաթղթերը վավերացվեն դաշինքի բոլոր երկրների կողմից։