Ներկայումս ԱՄՆ նախագահ Ջո Բայդենի վարչակազմը չի կարողանում Ուկրաինայի անվտանգության հստակ երաշխիքներ մշակել։
Այս մասին օգոստոսի 29-ին գրում է The Wall Street Journal (WSJ) ամերիկյան հրատարակությունը։ Նշվում է, որ նման երաշխիքների մշակումը հնարավոր չէ, քանի որ Վաշինգտոնը կարճաժամկետ հեռանկարում չի պատկերացնում, թե ինչպես ապահովել դրանց իրականացումը։
Ամերիկացի լրագրողները հիշեցնում են, որ առաջիկա շաբաթներին ԱՄՆ-ի և Ուկրաինայի ներկայացուցիչները նախատեսում են բանակցությունների երկրորդ փուլ անցկացնել և քննարկել ՆԱՏՕ-ի գագաթնաժողովի ժամանակ խոստացված անվտանգության երաշխիքները։
Սակայն այս բանակցությունները կարող են հանգել դատարկ խոստումների, քանի որ Սպիտակ տունը հստակ չի պատկերացնում, թե ինչ երաշխիքներ կարող է տալ Վաշինգտոնը։ Հատկապես հաշվի առնելով, որ ընտրություններից հետո նոր վարչակազմը կկարողանա չեղարկել նախորդի գրեթե բոլոր պարտավորությունները։
Հրապարակման ուշադրության կենտրոնում է այն փաստը, որ եթե նախագահական ընտրություններում հաղթի Հանրապետական կուսակցության ներկայացուցիչներից մեկը, Ուկրաինային օգնությունը կարող է կտրուկ նվազել։ Իսկ եվրոպական երկրները պարզապես չեն կարողանա աջակցել Կիևին նույն մակարդակով, ինչ Վաշինգտոնը։
Այս հանգամանքը, որը նշվում է WSJ-ում, անհանգստացնում է արևմտյան առաջնորդներին, որոնք փորձում են ուղիներ գտնել՝ շարունակելու ռազմական և ֆինանսական օգնություն տրամադրել Կիևի ռեժիմին։