«ՀԱՊԿ կանոնադրության համաձայն` ՌԴ-ն պետք է միջամտեր, եթե Հայաստանը հարձակման ենթարկվեր մեկ այլ պետության կողմից, ինչը վերջին տարիներին տեղի է ունեցել. ՀՀ որոշ տարածքներ դեռևս օկուպացիայի տակ են Ադրբեջանի կողմից: Ինչպես եք բացատրում ՌԴ` չմիջամտելու և իր ՀԱՊԿ պարտավորությունները չկատարելու պահվածքը»,- իտալական La Repubblica պարբերականի թղթակցի այս հարցին ՀՀ վարչապետը պատասխանեց.
«ՀԱՊԿ գործունակության ու պայմանագրունակության առումով Ձեր նկարագրած իրավիճակը խոսում է ճգնաժամի մասին: Դա չեմ կարծում, թե միայն ՀՀ պրոբլեմն է, ամբողջությամբ հենց ՀԱՊԿ պրոբլեմն է. բացատրությունները տարբեր կարող են լինել, բայց գոնե մեր տեսակետից դրանք կարևոր չեն: Այն, որ ՀՀ հանրությունը խոր հիասթափություն է ապրել և ապրում ՀԱՊԿ գործելակերպից, կարծում եմ` ակնհայտ է, նաև սա է պատճառը, որ մենք ՀԱՊԿ` 2022 թ. աշնանը Երևանում տեղի ունեցած գագաթաժողովի ընթացքում չվավերացրեցինք, չմիացանք մի շարք փաստաթղթերի»: