Իլոն Մասկը հայտարարել է ԱՄՆ առաջիկա նախագահական ընտրություններում Հանրապետական կուսակցությանն աջակցելու մասին։ Մասկը այս մասին գրել է մարտի 24-ին X-ի իր էջում:
«Մի քանի տարի առաջ ես 100%-ով քվեարկեցի դեմոկրատների օգտին: Հիմա կարծում եմ, որ մեզ անհրաժեշտ է «կարմիր ալիք» (կարմիրը հանրապետականների գույնն է ), այլապես Ամերիկան կվերջանա»,- գրել է Մասկը:
ԱՄՆ նախկին նախագահ Դոնալդ Թրամփն արդեն ստացել է անհրաժեշտ թվով պատվիրակների ձայներ՝ ԱՄՆ նախագահի հանրապետական թեկնածու առաջադրվելու համար։ Պետության ներկայիս ղեկավար Ջո Բայդենը, որն առաջադրվում է երկրորդ ժամկետի համար, ապահովել է Դեմոկրատական կուսակցության բավարար թվով պատվիրակների աջակցությունը։ Այսպիսով, պայքարը կանխատեսելիորեն կծավալվի նույն թեկնածուների միջև, ինչպես չորս տարի առաջ, երբ Բայդենը հաղթեց Թրամփին, որը ձգտում էր վերընտրվել բարձրագույն կառավարական պաշտոնում:
ԱՄՆ նախագահական ընտրությունները տեղի կունենան նոյեմբերի 5-ին։