Բաժանորդագրվեք araratnews-ի  տելեգրամ ալիքին։

Արաբական Միացյալ Էմիրությունների և Հայաստանի Հանրապետության հարաբերությունները հիմնված են փոխադարձ հարգանքի, համագործակցության և խաղաղության վերաբերյալ ընդհանուր արժեքների վրա:

«Արմենպրես»-ի հաղորդմամբ՝ այս մասին ասաց ՀՀ-ում ԱՄԷ դեսպան Նարիման Ալ-Մուլլան՝ Արաբական Միացյալ էմիրությունների կազմավորման 53-ամյակի առթիվ կազմակերպված պաշտոնական ընդունելությանը: 

«1971 թվականի դեկտեմբերի 2-ին պատմական միավորումից սկսած՝ մեր երկիրը վերածվել է դիմադրողականության, նորարարության և հնարավորությունների համաշխարհային խորհրդանիշի: Մեր պատմությունը վերափոխման պատմություն է: Այն, ինչ սկսվեց որպես համեստ ֆեդերացիա, այժմ դարձել է բազմազանության, հանդուրժողականության և նորարարության բարգավաճ կենտրոն»,-ասաց դեսպանը՝ հավելելով, որ ԱՄԷ-ն զգալի քայլեր է ձեռնարկել՝ ցուցադրելով իր առաջնորդությունը կայուն ապագայի ուղղությամբ միջազգային համագործակցության խթանման գործում:

 Նրա խոսքով՝ դիվանագիտական մակարդակում ԱՄԷ-ն վստահելի գործընկեր է խաղաղության և կայունության ապահովման հարցում՝ խթանելով երկխոսությունն ու համագործակցությունը տարածաշրջանային և համաշխարհային հարթակներում:

 Անդրադառնալով ՀՀ-ԱՄԷ հարաբերություններին, նախ ընդգծեց, որ դրանք հիմնված են փոխադարձ հարգանքի, համագործակցության և խաղաղության վերաբերյալ ընդհանուր արժեքների վրա:

«ԱՄԷ կառավարությունն առաջնորդվում է միջազգային մակարդակում անընդմեջ գերազանցության հասնելու և առաջին տեղում դասվելու հավակնությամբ։ Այս տեսլականին աջակցելն իմ գլխավոր առաքելություններից է, և ՀՀ-ի հետ ավելի ամուր տնտեսական կապերի ձևավորումը կարևոր քայլ է այս նպատակի իրագործման ուղղությամբ»,-ասաց Նարիման Ալ-Մուլլան՝ հավելելով, որ ԱՄԷ-ի նվիրվածությունը տարածաշրջանային խաղաղությանը, հատկապես Հարավային Կովկասում, արտացոլում է համոզմունքը, որ երկխոսությունն ու միասնությունը կարող են հիմք դնել ավելի լավ և բարեկեցիկ ապագայի համար։

«Այս գեղեցիկ երկրում ես անձամբ ականատես եմ եղել համագործակցության մեծ ներուժի։ Բարեկեցության և խաղաղության մեր ընդհանուր տեսլականը կշարունակի ուղղորդել մեր ջանքերը՝ խորացնելով այս գործընկերությունը։ ԱՄԷ-ն ոչ միայն Հայաստանի ընկերն է, այլև ձգտում է լինել նրա ամենահավատարիմ գործընկերը»,- ընդգծեց նա:

Շնորհավորելով ԱՄԷ կազմավորման 53-րդ տարեդարձի կապակցությամբ՝ ՀՀ փոխվարչապետ Մհեր Գրիգորյանը նշեց, որ Արաբական Միացյալ Էմիրությունները ավանդաբար եղել և շարունակում է մնալ Հայաստանի համար առանցքային նշանակություն ունեցող երկիր,որի հետ բարդրացիական հարաբերությունները հիմնված են փոխադարձ հարգանքի և բարեկամության վրա:

«Տպավորված ենք Էմիրությունների թե տարածաշրջանային, թե գլոբալ հարթակներում ունեցած ձեռքբերումներով, երկրում իրականացվող նորարական բարեփոխումներով, ինչպես նաև պետական ինստիտուտների արդյունավետ աշխատանքով: Նախորդ տարի մեր երկրները նշել են դիվանագիտական հարաբերությունների հաստատման 25-ամյակը: Այս հոբելյանը մեր համատեղ անցած ուղին ու կատարված աշխատանքը գնահատելու և ապագա գործընկերության ուղղությունները նախանշելու պատեհ հանգրվան էր: Այս ընթացքում մեր երկրները կառուցել են ամուր և դինամիկ զարգացող բազմաոլորտ համագործակցություն՝ որակապես նոր մակարդակի բարձրացնելով միջպետական հարաբերությունները»,-նշեց Գրիգորյանը՝ ավելացնելով, որ անցած տարիների ընթացքում հայ-էմիրաթական արգասաբեր փոխգործակցության արդյունքում գրեթե բոլոր բնագավառներում գրանցվել են նշանակալի ձեռքբերումներ: 

Նրա խոսքով՝ ԱՄԷ-ն Միջին Արևելքի և Ծոցի տարածաշրջանում ՀՀ առաջին առևտրային գործընկերն է: Մեր երկրների միջև առևտրի ծավալը շարունակական աճի բարձր տեմպեր է արձանագրում: 

Փոխվարչապետը բարձր գնահատեց երկու երկրների միջև կապեր սերտացման գործում Հայատսանում ԱՄԷ դեսպանի անձնական ավանդը, ինչպես նաև դեսպանության կողմից սոցիալական ու մարդասիրական տարբեր ծրագրերի իրականացումը:

«Ցանկանում եմ ընդգծել, որ թե քաղաքական, թե տնտեսական փոխգործակցությունը երկու երկրների միջև շարունակաբար զարգանում է: Հավատացած եմ, որ առկա հարաբերությունների խորացման մեծ չբացահայտված ներուժ կա: Վստահ եմ, որ համատեղ ջանքերի գործադրմամբ հնարավոր կլինի ինստիտուցիոնալ մակարդակով իրացնել մեր երկրների միջև առկա ընդգրկուն օրակարգի ընդլայնումը ի շահ և ի բարօրություն մեր երկու ժողովուրդների»,-եզրափակեց Գրիգորյանը:

Միջոցառմանը ներկա էին ՀՀ բարձրաստիճան պաշտոնյաներ, գործարարներ, դիվանագիտական կառույցների ղեկավարներ, ինչպես նաև մշակութային և գիտակրթական հաստատությունների ներկայացուցիչներ։