Բաժանորդագրվեք araratnews-ի տելեգրամ ալիքին։
Մարտի 16-ից Հայաստանն իրավունք կունենա սկսել ԵՄ երկրներ բարձրորակ ակվակուլտուրային ձկան և ձկնամթերքի արտահանումը։ Այս մասին մարտի 13-ին լրագրողների հետ հանդիպմանն ասաց Հայաստանի սննդամթերքի անվտանգության տեսչության պետի տեղակալ Տիգրան Պետրոսյանը։
Նա ասաց, որ բանակցությունները տևել են շուրջ 8 տարի, ինչի արդյունքում Հայաստանը դարձել է տարածաշրջանում առաջին երկիրը, որը իրավունք է ստացել բոլոր տեսակի ակվակուլտուրային ձուկ և ձկնամթերք արտահանել ԵՄ։ Պաշտոնյան հավելեց, որ ձեռնարկությունները պետք է ներառվեն TRACES համակարգում՝ կենդանական ծագման մթերքների վերահսկման և հետագծման բարելավման հավելվածում։
Նրա խոսքով, արտահանման վերջնական թույլտվությունը կտրամադրի Սննդի անվտանգության տեսչությունը՝ լաբորատոր հետազոտություններից և լիցենզիաներ տրամադրելուց հետո։ Պետրոսյանը նշեց, որ տնտեսվարող սուբյեկտները շահագրգռված են ապրանքներ արտահանել ԵՄ։
ՀՀ էկոնոմիկայի նախարարության անասնաբուծության վարչության պետ Տիգրան Ալեքսանյանն, իր հերթին, վստահեցրեց, որ վերջին տարիներին հանրապետությունում ակտիվորեն զարգանում է ձկնաբուծության ոլորտը, և տնտեսվարողները համապատասխան տեխնոլոգիաներ են ներդնում ջրային ռեսուրսների ռացիոնալ օգտագործման և բարձրորակ արտադրանքի արտադրության համար։
Նրա խոսքով, պետությունն աջակցության ծրագիր է իրականացնում այն տնտեսվարող սուբյեկտների համար, որոնք նորագույն տեխնոլոգիաներ են ներդնում և ձեռք են բերում հումքի վերամշակման սարքավորումներ։ Նա համոզմունք հայտնեց, որ, ելնելով նաև կենսակլիմայական պայմաններից, Հայաստանում արտադրվող ձուկն ու ձկնամթերքը որակյալ են և մեծ պահանջարկ ունեն արտերկրում։
«Տարեցտարի արտադրության ծավալներն ավելանում են։ 2024 թվականին արտադրվել է մոտ 27 հազար տոննա ձուկ և ձկնամթերք, ինչը 4-5 տոկոսով ավելի է նախորդ տարվա համեմատ»,- ընդգծեց Ալեքսանյանը։ Պաշտոնյան հույս է հայտնել, որ ԵՄ արտահանման որոշումը խթան կհանդիսանա արտադրության տեմպերի բարձրացման համար։
Նա հավելեց, որ Հայաստանի ձկնաբուծության ոլորտն ինքնաբավ է և այս ցուցանիշով հետխորհրդային երկրների առաջին հնգյակում է։
«Հայաստանի ձկնաբույծների միություն» հասարակական կազմակերպության տնօրեն Գոռ Գրիգորյանն, իր հերթին, պարզաբանեց, որ հանրապետությունում արտադրված 27 հազար տոննա ձկնամթերքից և ձկնամթերքից 15 հազար տոննան արտահանվել է։ Նա նշեց, որ Հայաստանից ձկան ու ձկնամթերքի արտահանումը նոր երեւույթ չէ։ «Մեր երկիրն արտահանում է ապրանքներ Ռուսաստան, ԱՄԷ և ԱՄՆ, որոնք ունեն ԵՄ-ից ոչ պակաս խիստ պահանջներ»,- եզրափակեց փորձագետը։