Բաժանորդագրվեք araratnews-ի  տելեգրամ ալիքին։

ՀՀ ԱԺ նախագահի տեղակալ Հակոբ Արշակյանն ապրիլի 4-ին ընդունել է Վիետնամի Սոցիալիստական Հանրապետության Ազգային ժողովի փոխնախագահ Ճան Քուան Ֆընին և Վիետնամի խորհրդարանի պատգամավորներին: ԱԺ-ից հայտնում են, որ հյուրերը մեր երկրում են Վիետնամի ԱԺ նախագահ Չան Թան Մանի այցի շրջանակում:

Ողջունելով նման ներկայացուցչական պատվիրակության պաշտոնական այցը Հայաստան՝ ՀՀ ԱԺ փոխնախագահն արձանագրել է, որ Վիետնամի հետ մեր երկիրն ունի ջերմ երկխոսություն, որը շարունակական զարգացման միտում ունի: Նրա գնահատմամբ ՀՀ ԱԺ նախագահ Ալեն Սիմոնյանի` վերջերս կատարած այցը Վիետնամ և Վիետնամի ԱԺ նախագահի փոխադարձ այցը Հայաստան նոր հնարավորություններ են ստեղծում երկխոսության զարգացման համար:

Հակոբ Արշակյանը կարևորել է երկու երկրների միջև բազմոլորտ կապերի խթանումը, խոսել ռազմարդյունաբերության ու պաշտպանության բնագավառներում գործակցության հնարավորությունների մասին: Նրա գնահատմամբ՝ Վիետնամում անցկացված Defense Expo 2024 ցուցահանդեսին հայկական մասնակցությունը նույնպես համագործակցության ցուցիչ է: ԱԺ փոխնախագահը կարևոր է համարել նաև վիետնամական ընկերությունների ներկայությունը մեր երկրում անցկացվող նմանատիպ միջոցառումներին:

Ըստ Հակոբ Արշակյանի՝ մուտքի վիզաների պահանջի փոխադարձաբար վերացման ու օդային հաղորդակցությունների մասին համաձայնագրերի ստորագրումը և երկու պետությունների միջև ուղիղ ավիաչվերթերի հաստատումն առանցքային նշանակություն կարող են ունենալ: Ֆինանսական ոլորտում փոխգործակցության մասով էլ նա առաջարկել է բանակցություններ սկսել կրկնակի հարկումից խուսափելուն առնչվող համաձայնագրի կնքման շուրջ: ԱԺ փոխխոսնակը կարևորել է նաև կապերի զարգացումը կրթության բնագավառում:

ՀՀ ԱԺ փոխնախագահը հյուրերին ներկայացրել է տարածաշրջանային մարտահրավերները, Հայաստանի և Ադրբեջանի միջև խաղաղության պայմանագրի շուրջ ընթացող բանակցությունները, փաստել, որ հայկական կողմը պատրաստ է ստորագրելու փոխհամաձայնեցված փաստաթուղթը:

Վիետնամի Ազգային ժողովի փոխնախագահն իր հերթին արժևորել է տարածաշրջանային խաղաղությունն ու կայունությունը, աջակցություն հայտնել Հայաստանի և Ադրբեջանի միջև հարաբերությունների կարգավորման գործընթացին: Ճան Քուան Ֆընը եւս բարձր է գնահատել Հայաստանի և Վիետնամի միջև հաստատված բարեկամական հարաբերությունները, կարևորել բազմաբևեռ համագործակցության խորացումը: Անդրադարձ է եղել նաև միջխորհրդարանական հարթակներում փոխգործակցության օրակարգերին:

Հանդիպմանը մասնակցել են նաև ՀՀ ԱԺ Հայաստան-Վիետնամ բարեկամական խմբի անդամ Արուսյակ Մանավազյանն ու ԱԺ պաշտպանության և անվտանգության հարցերի մշտական հանձնաժողովի նախագահի տեղակալ Արմեն Խաչատրյանը: