Բաժանորդագրվեք araratnews-ի  տելեգրամ ալիքին։

ԱՄՆ նախագահ Դոնալդ Թրամփը հայտարարել է, որ Իսրայելի և Իրանի միջև շարունակվող հակամարտությունը արագորեն սրվում է։ Նա նշել է, որ Կանադայում անցկացվող «Մեծ յոթնյակի» (G7) գագաթնաժողովից մի օր շուտ կվերադառնա Վաշինգտոն՝ զարգացումներին անմիջապես հետևելու նպատակով։

«Ես պետք է հնարավորինս շուտ վերադառնամ։ Պետք է շուտ վերադառնամ՝ ակնհայտ պատճառներով»,– ասել է նախագահը։

Սկզբում նախատեսված էր, որ Թրամփը Կանադայում կմնա մինչև երեքշաբթի ուշ երեկո, սակայն արդեն երկուշաբթի կեսօրին ակնառու դարձավ, որ իր ուշադրությունը սևեռված է այլ ուղղության վրա։

«Կարծում եմ՝ Իրանը հիմա բանակցությունների սեղանի մոտ է և ցանկանում է համաձայնության հասնել։ Եվ հենց այստեղից հեռանամ, մենք գործողությունների կանցնենք»,– հայտարարել է Թրամփը՝ Կանանասկիս հանգստավայրում G7 առաջնորդների հետ հանդիպումից հետո։

Մի քանի ժամ անց Թրամփը սոցիալական ցանցում գրառում է կատարել՝ հղված իրանցիներին. «Բոլորը պետք է անհապաղ տարհանվեն Թեհրանից»։

Բացի այդ, նախագահ Թրամփը հրավիրել է ԱՄՆ Ազգային անվտանգության խորհրդի արտակարգ նիստ՝ Մերձավոր Արևելքում ստեղծված իրավիճակը քննարկելու համար։ Ամերիկյան պարբերականների հաղորդմամբ՝ նա հանձնարարել է ԱՄՆ դիվանագետներին անհապաղ հանդիպում կազմակերպել Իրանի ներկայացուցիչների հետ։