Ռոբերտ Քոչարյանի փախուստի հավանականությունը մեծ է: Նրա գույքի մեծ մասը այլոց անուններով է: Գույքը կալանքից հանելու, այն վաճառելու զրույցները կարող են մեր մտավախությունը իրականություն դարձնել: Araratnews.am-ի թղթակցին ասաց Մարտի մեկի դեպքերի ժամանակ տուժածների իրավահաջորդների ներկայացուցիչ Սեդա Սաֆարյանը:
Նրա խոսքով՝ Հայաստանից փախած պաշտոնյաներին ընդունում է Ռուսաստանը, նրանք Հայաստան վերադառնալու հույս չեն փայփայում: «Երբ Քոչարյանը համոզվի, որ այն, ինչ նախաձեռնել է, չեն կարողանալու անել, ունի հնարավորություն Հայաստանը լքելու»,- համոզված է փաստաբանը:
Փաստաբանին հարցրինք՝ ինչո՞ւ Ռոբերտ Քոչարյանի պաշտպաններն այս փուլում չեն ներկայացրել գույքի գնահատման արժեքն ու դա հաստատող փաստաթղթեր: Ըստ Սաֆարյանի՝ դա արվում է դատական գործը ձգձգելու ու փախուստը իրականացնելու համար, եթե նրա ծրագիրը ձախողվի: «Դատարանը պետք է փոքր-ինչ ակտիվանա: Այն, ինչ արվում է մեկ տարի, կարող էին 3 ամսում լինել: Օրինակ, կարճացներ ելույթ ունեցողների խոսքի ազատությունը, մի ամսում երկու նիստ լիներ: Տպավորություն է, որ դատարանը հավերժ լսելու նպատակուղղված գործընթացներ է անում»,- կարծում է տիկին Սաֆարյանը:
Եթե 2008 թ-ի Մարտի մեկի գործով դատական գործընթացը մտնի դատաքննության փուլ, ապա հանրային պահանջը՝ Ռոբերտ Քոչարյանին ցմահ պատիժ տալը, հնարավոր է կյանքի կկոչել, ըստ փաստաբանի, քանի որ Քոչարյանին վերագրվող մեղադրանքները անառարկելի են: «Այդ պատճառով Քոչարյանի պաշտպանները չեն ցանկանում, որ հրապարակվի մեղադրանքը»,- ավարտեց իր խոսքը Մարտի մեկի դեպքերի ժամանակ տուժածների իրավահաջորդ Սեդա Սաֆարյանը:
Սոնա Դավթյան