Բաժանորդագրվեք araratnews-ի տելեգրամ ալիքին։
Իրանի արտաքին գործերի նախարար Աբբաս Արաղչին հայտարարել է, որ Թեհրանը պատրաստ է թե՛ ագրեսիայի նոր փուլին, թե՛ Վաշինգտոնի հետ հակամարտության դիվանագիտական կարգավորմանը՝ ընտրությունը թողնելով ԱՄՆ նախագահ Դոնալդ Թրամփին։
«Մենք լիովին պատրաստ ենք պատերազմի վերսկսմանը և կրկնում եմ՝ մենք կդիմակայենք ցանկացած նոր ագրեսիայի, նույնիսկ եթե այն վերածվի դատաստանի օրվա պատերազմի։ Միևնույն ժամանակ, մենք պատրաստ ենք դիվանագիտության։ Ընտրությունը նախագահ Թրամփինն է»,- NBC News-ի «Meet the Press» հաղորդման եթերում կիրակի օրը հայտարարել է Արաղչին՝ մեկնաբանելով այն հրապարակումը, թե Թրամփը կարող է ԱՄՆ միջանկյալ ընտրություններից հետո վերսկսել Իրանի ռմբակոծությունը։
Անդրադառնալով Հորմուզի նեղուցի վերաբերյալ իրանական կողմի վերջին առաջարկները Թրամփի կողմից մերժելու փաստին՝ նախարարը նշել է, որ Թեհրանը միջնորդների միջոցով պաշտոնապես տեղեկացված չի եղել այդ մերժման մասին։
Նա ընդգծել է, որ Իրանը ձգտում է նեղուցի բացմանը՝ որպես հակամարտության ավարտին ուղղված համաձայնագրի մաս և ակտիվների ապասառեցման դիմաց։