Լյուքսեմբուրգ այցելության ընթացքում Նիդեռլանդներում ՀՀ դեսպան Տիգրան Բալայանն այցելել է Պատգամավորների պալատ, ուր նրան ընդունել է խորհրդարանի նախագահ Ֆերնան Էշտենը։
 

Օրենսդիր մարմնի ղեկավարին հանձնելով ՀՀ ԱԺ նախագահ Արարատ Միրզոյանի ուղերձը՝ Տիգրան Բալայանը շնորհակալություն է հայտնել Լյուքսեմբուրգի խորհրդարանի՝ Արցախի դեմ ագրեսիան դատապարտող միաձայն բանաձևերի համար։
 

Խորհրդարանի ղեկավարի խնդրանքով՝ դեսպան Բալայանը մանրամասն ներկայացրել է Ադրբեջանի և Թուրքիայի կողմից Արցախի դեմ իրականացված ագրեսիայի ընթացքում և դրանից հետ կատարված ռազմական հանցագործությունները, կարևորել խորհրդարանների դերակատարությունը և հետևողականությունն Ադրբեջանի ռազմաքաղաքական ղեկավարությանը պատասխանատվության ենթարկելու գործընթացում։
 

Զրույցի ընթացքում հանգամանալից անդրադարձ է արվել երկկողմ համագործակցության խորացման հնարավորություններին և կարևորվել խորհրդարանական դիվանագիտության կարևոր ներդրումն այդ հարցում։
 

Այցի շրջանակներում դեսպան Բալայանը հանդիպել է Լյուքսեմբուրգի Առևտրի պալատի նախագահ Լյուկ Ֆրիդենի հետ։ Հանդիպմանը հանգամանալից անդրադարձ է կատարվել Հայաստանի և Լյուքսեմբուրգի միջև առևտրատնտեսական համագործակցության հնարավոր ուղղություններին և ընդլայնման նպատակով գործնական քայլերին։
 

Տիգրան Բալայանը հանդիպել է նաև Լյուքսեմբուրգի համալսարանի ռեկտոր Ստեֆան Պալաժին, ում հետ մտքեր են փոխանակվել գիտակրթական բնագավառում համագործակցության հաստատման շուրջ։

 

12 Փետրվար, 2021 09:23
94
; ;