Ճապոնիայի նորանշանակ վարչապետ Ֆումիո Կիշիդան իր առաջին ասուլիսում ասել է, որ մտադիր է «նոր կապիտալիզմ կառուցել երկրում»:
«Այն, ինչին ես ձգտում եմ, նոր կապիտալիզմն է: Այն պետք է իրականացվի` մեր երկրի ապագան սկսելու համար: Դա նոր տնտեսության և հասարակության տեսլականն է: Դրա համար ես մտադիր եմ երկխոսություն վարել ժողովրդի հետ: Նոր կապիտալիզմի հայեցակարգը զարգացման և բաշխման ցիկլի մասին է: Եթե (տնտեսական) զարգացման պտուղները չբաշխվեն, ապա ո՛չ սպառումը, ո՛չ պահանջարկը չեն աճի, և հետագա աճի համար հիմքեր չեն լինի»,- ասել է  Ֆումիո Կիշիդան:
Երկուշաբթի օրը Ֆումիո Կիշիդան դարձավ Ճապոնիայի 100-րդ վարչապետը: 2012-2017 թթ․ նա զբաղեցրել է արտաքին գործերի նախարարի պաշտոնը, որն ամենաերկարն է հետպատերազմյան Ճապոնիայի պատմության մեջ:

524