Ազգային ժողովն առաջին ընթերցմամբ ընդունեց ՀՀ քաղաքացիական օրենսգրքում առաջարկվող լրացումը:
Նախաձեռնությունը հեղինակել են ԱԺ «Քաղաքացիական պայմանագիր» խմբակցության պատգամավորներ Տաթևիկ Գասպարյանը, Լենա Նազարյանը և Նարեկ Բաբայանը:
«Խնդիրը բացահայտվել է զոհված զինծառայողներ ընտանիքներ մեր այցելության ժամանակ: Մեր օրենսդրությամբ` ժառանգությունը կարող է ընդունվել քաղաքացու մահվան օրվանից վեց ամսվա ընթացքում: Սակայն, ըստ Լենա Նազարյանի, այն դեպքում, երբ անձը մահացել է կոնկրետ հայտնի ժամանակահատվածում, և վեց ամսվա ընթացքում մահացած անձի ինքնությունը չի պարզվել, ժառանգություն ընդունելու գործընթացը դժվարանում է, քանի որ ժառանգություն ստացողը բաց է թողնում վեց ամսում ժառանգություն ստանալու համար նոտարին դիմելու հնարավորությունը: Սա մի խնդիր է, որին բախվել են 2020-ի սեպտեմբերի 27-ին սկիզբ առած պատերազմում զոհված և տևական ժամանակ ինքնությունը չպարզված անձանց հարազատները»,- ասաց Լենա Նազարյանը:
Խնդրի լուծումը, ըստ նախագծի համահեղինակի, հետևյալն է. այն դեպքում, երբ քաղաքացու ինքնությունը չի հաստատվել մահվան պահից առնվազն մեկ ամսվա ընթացքում, ժառանգության բացման օրը անհրաժեշտ է համարել ոչ թե մահվան օրը, այլ մահվան պետական գրանցման օրը:
«Այս լուծումը չի տարածվելու այն դեպքերի վրա, երբ օրենքի՝ ուժի մեջ մտնելու օրվա դրությամբ արդեն իսկ կա ժառանգություն ընդունելու կամ ժառանգական իրավունքի վկայագիր ստանալու մասին նոտարին ներկայացված դիմումը»,- ասաց Նազարյանը: