Ոստիկանության Կոտայքի մարզային վարչության ենթակա տարածքային ստորաբաժանումների ծառայողների բացատրական աշխատանքի արդյունքում արձանագրվել են ապօրինի պահվող զենք-զինամթերքի կամավոր հանձնման դեպքեր։

Այս մասին տեղեկացրին ՀՀ ոստիկանությունից, Հրազդանում բնակվող մի տղամարդ կամավոր հանձնել է «Կալաշնիկով» գնդացիր և ռազմամթերք։

«Հրազդանի մի բնակիչ էլ կամավոր հանձնել է հանգուցյալ ամուսնու հրացանը, որը ձևափոխված էր ատրճանակի, նաև՝ ռազմամթերք։ Զենք-զինամթերքի կամավոր հանձնումը Հրազդանի համայնքային ոստիկանների բացատրական աշխատանքի արդյունք է։

Ոստիկանության Կոտայքի բաժնի Բյուրեղավանի բաժանմունքի ծառայողների բացատրական աշխատանքի շնորհիվ մի տղամարդ հանձնել է «Կալաշնիկով» ինքնաձիգ և ռազմամթերք։

Արդյունավետ էր նաև ոստիկանության Չարենցավանի բաժնի ծառայողների բացատրական աշխատանքը, ինչի շնորհիվ Չարենցավանի բնակիչներից մեկը կամավոր հանձնել է Արցախից բերած «Կալաշնիկովի» ինքնաձիգ և ռազմամթերք։

Բացատրական աշխատանք են իրականացրել նաև ոստիկանության Նաիրիի բաժնի հերթապահ մասի ծառայողները, ինչի շնորհիվ Եղվարդի բնակիչներից մեկը կամավոր հանձնել է ռազմամթերք, այդ թվում՝ պայթուցիչով նռնակ»,- ասվում է հաղորդագրության մեջ

ՀՀ ոստիկանությունը կրկին հորդորում է ապօրինի զենք-զինամթերքը կամավոր հանձնել ոստիկանություն՝ քրեական պատասխանատվությունից խուսափելու համար։

Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

393