Հունական առաջատար թերթերից մեկը անդրադարձել է Ադրբեջանի ագրեսիվ գործողություններին հայ-ադրբեջանական սահմանին՝ նշելով, որ սա նաև մեծ վտանգ է Հունաստանի համար։
Պարբերականը գրում է, որ Թուրքիան ձգտում է Կենտրոնական Ասիայում ստեղծել միջանկյալ աշխարհահամակարգ, որը կշարժվի և կգործի ինքնավար՝ օգտագործելով Եվրատլանտյան Արևմուտքի մրցակցությունը և եվրասիական պետությունների մոտալուտ կոլեկտիվացումը։
«Այն, ինչ կատարվում է Հայաստանում, ուղղակիորեն կապված է Անկարայի նպատակների հետ։
Թուրքիան դե ֆակտո առաջատար է այս սխեմայում, որը բաղկացած է հիմնականում թյուրքալեզու երկրներից։ Կենտրոնական և Հարավային Ասիայում այս միավորման առանցքը Թուրքիա-Ադրբեջան համակարգն է։ Իսկ նրանց միջեւ եղած փուշը Հայաստանն է։ Ուստի Հայաստանը պետք է կազմաքանդվի Թուրքիայի և Ադրբեջանի կողմից։ Հայաստանի նկատմամբ տարած հաղթանակը և դրան հաջորդած աշխարհաքաղաքական խեղումն ու արբանյակացումը ավելի կամրապնդեն թուրք-ադրբեջանական պլանի միասնությունը։
Դրանով Թուրքիան կստանա հեղինակություն և աշխարհաքաղաքական հզորություն, որն անհրաժեշտ է տարածաշրջանի մնացած հատվածն իր ուղեծիր բերելու համար: Ավելին, աշխարհաքաղաքականորեն չեզոքացնելով Հայաստանը՝ Ադրբեջանն ավելի անկախ կդառնա Մոսկվայից և կկարողանա էլ ավելի շրջվել դեպի Թուրքիա՝ ամրապնդելով թուրք-ադրբեջանական սխեման»,- նշվում է հոդվածում։
Նյությում կոչ է արվում մենակ չթողնել Հայաստանին։
«Ընդհանրապես, Հայաստանի խեղումը, որին ձգտում է Բաքուն Անկարայի ղեկավարությամբ, կամրապնդի թուրքակենտրոն Կենտրոնական Ասիայի աշխարհահամակարգի համախմբվածությունը և նրա անկախությունը արտաքին միջամտությունից։ Սա էլ ավելի կամրապնդի Թուրքիայի դերը որպես անկախ դերակատար՝ հավասարակշռելու Արևմուտքում և Արևելքում՝ շանտաժի ենթարկելով երկուսն էլ։
Այլ կերպ ասած, դա կմեծացնի Թուրքիայի սակարկությունների առարկան՝ մեծացնել իր դերը ձևավորվող միջազգային համակարգում: Իսկ ավելի ուժեղ Թուրքիայի համար ավելի հեշտ կլինի գնալ այն «մեծ հնարքին», որին ցանկանում է հասնել։ Այսինքն՝ Հունաստանի և Կիպրոսի Հանրապետության աշխարհաքաղաքական անգործության պայմաններում Թուրքիան ավելի քիչ է վախենալու հզոր դերակատարների արձագանքից և շատ ավելի խաղաքարտեր կունենա նրանց հետ բանակցելու համար:
Ահա թե ինչու է Հունաստանի պաշտպանությունը սկսվում Հայաստանում։ Այնքան պարզ է: Հունական դիվանագիտությունը պետք է ամեն կերպ աջակցի Հայաստանին։ Դա պայմանավորված է նրանով, որ միասնական եվրասիական համակարգի ներսում չկան մեկուսացված մասեր, որոնք կտրված են մնացածից: Այն, ինչ կատարվում է մի մասում, ազդում է մնացածի վրա:
Իսկ Հայաստանի վրա թուրք-ադրբեջանական հարձակումը Թուրքիային ավելի վտանգավոր է դարձնում Հունաստանի համար»,- գրում է հոդվածագիրը։
Եզրափակելով միտքը՝ նշվում է՝
«Հայաստանին աջակցելը համերաշխություն չէ մի ժողովրդի նկատմամբ, ում հետ մենք շատ ընդհանրություններ ունենք, դա քայլ է, որն անհրաժեշտ է Հունաստանի անվտանգության և աշխարհաքաղաքական գործունեության համար մեկ միասնական և անբաժանելի աշխարհահամակարգում։
Հունական դիվանագիտությունը և արտաքին քաղաքականությունը, որը վերջին տարիներին ցույց է տալիս, որ ազատվել է նախկինում իրեն պատուհասած գավառականության սինդրոմից, պետք է քայլեր ձեռնարկի։ Իհարկե, Հունաստանը պետք է գործի անկախ՝ չսպասելով եվրոպական մնացած երկրներին, որոնք չունեն Թուրքիայի և Կենտրոնական Ասիայի նրա բարեկամների նման հարցեր»։