Սիրելի՛ հայրենակիցներ,

 

Շնորհավորում եմ բոլորիս մեր պետության համար այս կարևոր մշակութային օրվա՝ Թարգմանչաց տոնի կապակցությամբ։ Այն նվիրված է հայ գրերի գյուտին, թարգմանչաց շարժմանը և մշակույթի նշանավոր գործիչներին, և իր մեջ կրում է գրի ու դպրության, գիտելիքի ու իմաստնության լույսը՝ սկիզբ առնելով Աստվածաշունչն առաջինը հայերեն թարգմանողներից:

 

Սա առիթ է շնորհակալության և փառքի խոսք ասելու թարգմանչաց շարժման շարունակողներին, թարգմանչաց արվեստը զարգացնողներին, որոնց շնորհիվ հայ միտքը հնչում է նաև թարգմանաբար, իսկ հայ արվեստասեր հասարակությանը թարգմանաբար հասնում են համաշխարհային գրականության և մշակութային մտքի գոհարները։

 

Սիրելի՛ թարգմանիչներ, այժմ ավելի քան երբևէ, երբ թիկունքն ամուր պահելու և բռունցքվելու առաջնահերթություն ունենք, ձեր առաքելությունն է հայ քաղաքական ու մշակութային միտքը աշխարհին հասցնելը։ Դուք եք հայ խաղաղասեր ժողովրդի մշակութային պատգամախոսն աշխարհում և աշխարհի ձայնը՝ հայրենի երկրում, հենց ձեր շնորհիվ է աշխարհն առնչվում մեր քաղաքակրթական մտքին։

Շնորհավո՛ր ձեր մասնագիտական տոնը, թող ձեր գիտական, մշակութային միտքը ծաղկի ու զարգանա՝ ի փառս հայ ժողովրդի, հանուն համաշխարհային մշակույթի հնագույն մաս կազմող հայ մշակույթի հարատևման։

791