Իշխող «Վրացական երազանք-Ժողովրդավարական Վրաստան» կուսակցությունը 2024 թվականի խորհրդարանական ընտրություններում կոալիցիոն կառավարություն չի ստեղծի, այն կստանա սահմանադրական մեծամասնություն։ Այս մասին լրագրողներին հայտնել է քաղաքական ուժի գլխավոր քարտուղար, Թբիլիսիի քաղաքապետ Կախա Կալաձեն։
Վրաստանի նախագահ Սալոմե Զուրաբիշվիլին ավելի վաղ France 24 հեռուստաալիքին տված հարցազրույցում հույս էր հայտնել, որ խորհրդարանական ընտրությունների արդյունքներով հանրապետությունում կստեղծվի կոալիցիոն կառավարություն, որից հետո կսկսվեն ԵՄ-ին անդամակցելու բանակցությունները։
«Անհասկանալի է, թե ինչ կոալիցիոն կառավարության մասին է խոսքը, մարդիկ, որոնք այսօր կազմում են արմատական թեւը, որի կազմում է նաև Սալոմե Զուրաբիշվիլին, կտրված են իրականությունից, չեն զգում, թե ինչ է կատարվում երկրում և ինչ վերաբերմունք ունեն մարդիկ։ «Վրացական երազանքը» «միակ քաղաքական ուժն է, որը կհաղթի և իշխանության կգա սահմանադրական մեծամասնությամբ»,- ասել է Կալաձեն։
Սահմանադրական է համարվում այն մեծամասնությունը, որն ունի Վրաստանի խորհրդարանում 150 մանդատներից առնվազն 113-ը։ Պատգամավորների այս թիվը իրավունք է տալիս փոփոխություններ կատարել հանրապետության սահմանադրության մեջ։