Կիևում պայթյուններ են որոտացել, հաղորդում է ՌԻԱ Նովոստին՝ «Зеркало недели» «Տելեգրամ» ալիքին հղումով։ 

Ուկրաինայի թվային փոխակերպման նախարարության առցանց քարտեզի համաձայն՝ մայրաքաղաքում և տարածաշրջանում ավիահարվածի մասին ահազանգ է հայտարարվել ժամը 4:15-ին (ՀՀ ժամանակով 6:15-ին):

Կիևի քաղաքային ռազմական վարչությունն էլ հայտնել է, որ  երկուշաբթի լուսաբացին մայրաքաղաքը հարձակման է ենթարկվել, ինչի պատճառով ՀՕՊ համակարգեր են աշխատել։ Վարչության ղեկավար Սերգեյ Պոպկոյի հաղորդմամբ՝ հակառակորդի թիրախների խոցումից հետո դրանց բեկորներն ընկել են բնակելի թաղամասերում, ինչի հետևանքվ կան վիրավորներ։

Մասնավորապես, Կիևի Դառնիցկի թաղամասում միջադեպի հետևանքով կոտրվել են բնակելի տներից մեկի ապակիները՝ վնասվածքներ պատճառելով երկու մեծահասակի և մեկ երեխայի։

Կիևի քաղաքապետ Վիտալի Կլիչկոն իր հերթին իր ալիքում հայտնել է, որ շտապօգնության ծառայությունը կանչեր է գրանցել քաղաքի մի շարք շրջաններից, այդ թվում՝ Գոլոսեևսկի, Դառնիցկի և Շևչենկովսկի թաղամասերից։

Ռուսական բանակը նախորդ տարվա հոկտեմբերի 10-ից պարբերաբար հարձակումներ է իրականացնում Ուկրաինայի պաշտպանական արդյունաբերության, ռազմական հրամանատարության, կապի և էներգետիկայի օբյեկտների վրա։

Ինչպես նշել է Վլադիմիր Պուտինը, սա պատասխան է Ղրիմի կամրջի վրա կատարված ահաբեկչությանը և Ռուսաստանում քաղաքացիական ենթակառուցվածքների վրա կատարված այլ հարձակումներին։ Այդ ժամանակից ի վեր ամեն օր ուկրաինական շրջաններում, երբեմն՝ ողջ երկրում հայտարարվում է օդային հարձակման ահազանգ։