Բաժանորդագրվեք araratnews-ի տելեգրամ ալիքին։
ԱՄՆ-ի հետ բանակցությունները հնարավոր չեն, եթե որոշ բաներ չփոխվեն, իրանական լրատվամիջոցների հաղորդմամբ՝ կիրակի օրը հայտարարել է Իրանի արտաքին գործերի նախարար Աբբաս Արաղչին:
Այս ամիս Թեհրանը նամակ է ստացել ԱՄՆ նախագահ Դոնալդ Թրամփից, որում Իրանին երկու ամիս է տրվում՝ որոշելու՝ նոր բանակցությունների մեջ կմտնի, թե կբախվի ավելի խիստ պատժամիջոցների:
Մինչ երկրի գերագույն առաջնորդ այաթոլլա Ալի Խամենեին մերժել է բանակցությունների առաջարկը, Իրանի ԱԳ նախարարը հինգշաբթի օրը հայտարարել է, որ Թեհրանը շուտով կպատասխանի նամակում պարունակվող սպառնալիքներին ու հնարավորություններին:
Կիրակի օրը Արաղչին հավելել է, որ Վաշինգտոնը պետք է ճշգրտի իր քաղաքականությունը, նախքան Թեհրանը կմասնակցի բանակցություններին:
«Իմ կարծիքով՝ 2015 թվականի համաձայնագիրն իր ներկայիս տեսքով չի կարող վերականգնվել։ Դա մեր շահերից չի բխում, քանի որ մեր միջուկային իրավիճակը զգալիորեն բարելավվել է, և մենք այլևս չենք կարող վերադառնալ նախկին պայմաններին», - ասել է արտգործնախարարը, - «Նույնը կարելի է ասել մյուս կողմի պատժամիջոցների մասին»:
2018 թվականին Թրամփի օրոք ԱՄՆ-ն միակողմանի դուրս եկավ միջուկային համաձայնագրից և պատժամիջոցներ սահմանեց Թեհրանի նկատմամբ։