Բաժանորդագրվեք araratnews-ի տելեգրամ ալիքին։
«Իմ Քայլը» հիմնադրամի թիմը Լոռու մարզում՝ Վանաձորում, «Տնտեսապես կայուն ընտանիքներ» նախաձեռնության շրջանակում դասընթաց է անցկացրել, որին մասնակցել են Փամբակ, Ալավերդի և Սպիտակ համայնքներից ժամանած 10 շահառու ընտանիքներ։
Ինչպես «Արմենպրես»-ին տեղեկացրին «Իմ Քայլը» հիմնադրամից, դասընթացի ընթացքում մասնակիցները մեծ ուշադրությամբ հետևել են գյուղատնտեսական թեմաներով ներկայացվող տեղեկատվությանը, ակտիվորեն մասնակցել քննարկումներին և հղել հարցեր իրենց հետաքրքրող բույսերի մշակման, հողի նախապատրաստման և ջերմատնային աշխատանքի նրբությունների մասին։
Ըստ աղբյուրի՝ արդեն անհատական զրույցների փուլում ընտանիքները ծրագրի ղեկավարի հետ մանրամասն քննարկել են, թե իրենց առանձին նախագծերի համար ինչ սերմեր և սածիլներ կցանկանային ստանալ առաջիկա գործնական փուլում։
«Շահառուների ոգևորությունը և գործնականում կիրառելի գիտելիքների նկատմամբ հետաքրքրությունը ևս մեկ անգամ հաստատեցին, որ ծրագիրը շարժվում է ճիշտ ուղղությամբ՝ նպաստելով համայնքային տնտեսական կայունության և ընտանիքների սեփական բիզնեսների զարգացմանը»,- ասվում է հաղորդագրության մեջ։