Բաժանորդագրվեք araratnews-ի  տելեգրամ ալիքին։

Հունիսի 16-ին Գերմանիայում ՀՀ դեսպան Վիկտոր Ենգիբարյանը մասնակցել է Գերմանիայի տնտեսության արևելյան հանձնաժողովի ամենամյա ընդունելությանը, որի շրջանակներում զրույց է ունեցել կառույցի նախագահ Քաթրին Քլասս-Մյուլհաուզերի հետ: Այս մասին հայտնում է դեսպանությունը։

Հանձնաժողովը գերմանական տնտեսության խոշոր տարածաշրջանային միություն է, որը խթանում է Գերմանիայից արևելք ընկած 29 պետությունների՝ այդ թվում Հայաստանի հետ տնտեսական համագործակցությունը: Ավելի քան 350 անդամ ընկերություն ունեցող միությունը աջակցում է գերմանական և այդ թվում հայաստանյան ընկերություններին՝ հատկապես փոքր և միջին ձեռնարկություններին կապերի հաստատման, նախագծերի իրականացման և տարածաշրջանում տնտեսական շրջանակային պայմանների բարելավման ուղղությամբ։

ՀՀ դեսպանը Քաթրին Քլասս-Մյուլհաուզերին հրավիրել է այցելել Հայաստան և տեղում ծանոթանալ տարածաշրջանում խաղաղության դարաշրջանի մեկնարկով պայմանավորված նոր տնտեսական հնարավորություններին։