Ամերիկայի Միացյալ Նահանգների նախագահ Ջո Բայդենի ճանաչողական կարողությունները այնքան են վատթարացել, որ դարձել են «ազգային անվտանգության խնդիր», - այս մասին One America News-ին հայտնել է Սպիտակ տան նախկին բժիշկ և պատգամավոր Ռոննի Ջեքսոնը:
Նրա խոսքով, վերջին շրջանում պետության ղեկավարը ոչ լիովին ադեկվատ պահվածք է ցուցաբերում։ Նա նշել է, որ ներկա միջավայրում, երբ կա Ռուսաստանի հետ լայնամասշտաբ հակամարտության վտանգ, ամերիկացի առաջնորդը պետք է հստակ գիտակցի, թե ինչ է կատարվում։
«Ես չեմ փորձում ախտորոշում անել, բայց, իմ կարծիքով, ամբողջ աշխարհը տեսնում է, որ նա մտավոր ունակությունների հետ կապված ինչ-որ խնդիրներ ունի։ Կարծում եմ՝ նրա հետ հստակ ինչ-որ բան է կատարվում, սա ազգային անվտանգության խնդիր է»,- նշել է կոնգրեսականը։
Ջեքսոնը կարծում է, որ Բայդենը պետք է ճանաչողական խանգարումների թեստ անցնի և հրապարակի արդյունքները: Ժամանակին դա արեց իր նախորդ Դոնալդ Թրամփը՝ դրանով իսկ նախադեպ ստեղծելով, ամփոփեց բժիշկը։
Բայդենին բազմիցս առաջարկվել է հետազոտվել. փետրվարի սկզբին, երբ նախագահը վիրավորել էր լրագրողին, գրեթե 40 հանրապետական կոնգրեսականներ նման խնդրանքով նամակ էին ուղարկել։ Անցյալ հունիսին Սպիտակ տան նախկին բժիշկ Ջեքսոնը 13 կոնգրեսականների հետ ևս հորդորեց պետության ղեկավարին չհետաձգել ճանաչողական կարողությունների թեստը՝ պնդելով, որ ուղեղի դիսֆունկցիան և ամերիկացի առաջնորդի մոռացկոտությունն ավելի նկատելի են դարձել։