Հայաստանը Ռուսաստանի համար մերձավոր դաշնակից է, ինչը մնայուն փաստ է, և այս մասին երկրի ղեկավարության մակարդակով հայտարարում է Ռուսաստանի Դաշնությունը։ Այս մասին Sputnik Արմենիայի հետ զրույցում հայտարարեց ՀՀ–ում ՌԴ դեսպան Սերգեյ Կոպիրկինը։
Հայրենիքի պաշտպանի օրվա նախօրեին ՌԴ դեսպանատան աշխատակիցները վետերանների հետ միասին այցելել են «Մայր Հայաստան» հուշարձան ու ծաղիկներ խոնարհել անմար կրակի մոտ։
«Բնականաբար, պաշտպանական գերատեսչությունների գծով մեր համագործակցությունը, ընդհանրապես անվտանգության հարցերն առանցքային ոլորտներից են։ Այնպես որ, փոխգործակցությունը, գումարած մարտական եղբայրության ավանդույթները, որոնք ձևավորվել են հարյուրամյակներ շարունակ, ոչ մի տեղ չեն անհետացել։ Դա կա և շատ կարևոր մաս է կազմում ոչ միայն մեր պետությունների, այլև մեր ժողովուրդների համար»,– ասաց Կոպիրկինը։
Նա ընդգծեց, որ այսօր խորհրդային և հայկական զինված ուժերի վետերանները երկու տոն են նշում` Հայոց բանակի և Հայրենիքի պաշտպանի օրը։
Դեսպանը շեշտեց, որ կարևոր է պաշտպանական ոլորտում երկու երկրների միջև փոխգործակցությունը և դրա զարգացումը։
«Մեր դաշնակցային հարաբերություններին, անվտանգության ոլորտում փոխգործակցությանն այլընտրանք անձամբ ես չեմ տեսնում։ Դա բխում է մեր երկրների շահերից»,– նշեց Կոպիրկինը։
Նա նաև նկատեց, որ այն, ինչ հիմա տեղի է ունենում աշխարհում և տարածաշրջանում, այն մարտահրավերները, որոնց բախվում են երկու երկիրը, ավելի ակտուալ են դարձնում Հայաստանի և Ռուսաստանի հարաբերությունները։