Վարշավայում ընթանում է լեհական ընդդիմության բողոքի խոշոր ակցիան, հայտնում է РИА Новости-ն։
Մի քանի տասնյակ հազար մարդ է մասնակցել երթին, որը կազմակերպել էր Քաղաքացիական դաշինքի ղեկավար, Եվրահանձնաժողովի նախկին նախագահ Դոնալդ Տուսկը։ Ցուցարարները պատահական չէին ընտրել միջոցառման օրը՝ 1989 թվականի հունիսի 4-ին Լեհաստանում տեղի է ունեցել խորհրդարանի առաջին ազատ ընտրությունը։
Տուսկը, կոչ անելով մարդկանց մասնակցել ակցիային, ասել է, որ երթը կազմակերպվել է ի նշան իշխող «Օրենք և արդարություն» կուսակցության տնտեսական ու քաղաքական գործողությունների դեմ բողոքի։
Լեհաստանի ընդդիմության առաջնորդը հավելել է, որ երթը դեմ է «բարձր գներին, գողությանն ու ստին, պայքարում է հանուն ազատ ընտրությունների և ժողովրդավարական եվրոպական Լեհաստանի»։
Ի սկզբանե լեհական այլ ընդդիմադիր շարժումների առաջնորդները որոշել էին չմասնակցել միջոցառմանը, քանի որ դեռ չեն կարողացել դաշինք կազմել աշնանը կայանալիք խորհրդարանի ընտրությանն ընդառաջ: Սակայն երբ նախագահ Անջեյ Դուդան ստորագրել է երկրի անվտանգության վրա «ռուսական ազդեցությունը» ուսումնասիրող խորհրդարանական հանձնաժողով ստեղծելու մասին օրենքը, նրանք որոշել են միանալ երթին։ Ընդդիմությունը մտավախություն ունի, որ այս հանձնաժողովի օգնությամբ իշխող կուսակցությունը կխոչընդոտի ընտրություններին իր հակառակորդների մասնակցությունը։