Այսօր՝ հոկտեմբերի 19-ին, խոշոր հրդեհ է տեղի ունեցել Արարատի մարզում:
Ժամը 13:45-ի սահմաններում՝ ՀՀ ներքին գործերի նախարարության փրկարար ծառայության «9-11» ճգնաժամային կառավարկման ազգային կենտրոն ահազանգ է ստացվել, որ Նորամարգ գյուղի տներից մեկի ավտոտնակում ավտոմեքենա է այրվում:
Shamshyan.com-ը տեղեկացնում է, որ օպերատիվորեն ժամանել են Մասիսի թիվ 25 հրշեջ-փրկարարական ջոկատից 1 մարտական հաշվարկ և 1 ջրատար:
Պարզվել է, որ հրդեհը բռնկվել է ավտոտնակում կայանված Mercedes մակնիշի ավտոմեքենայում և տարածվել է՝ մինչև տան տանիք:
Մինչ հրշեջների ժամանումը, բնակչի հարևանները, այդ թվում՝ ՀՀ ՊՆ N զորամասի զինծառայողը, կարողացել են օպերատիվորեն տանից տարհանել բնակիչներին, այդ թվում՝ 2 երեխաների, ապա պայքարել են կրակի տարածման դեմ:
Հրշեջ-փրկարարների օպերատիվ և ճիշտ աշխատանքի շնորհիվ նախ կանխվեց կրակի տարածումը, ապա մեկուսացվեց կրակը:
Mercedes-ն ամբողջությամբ վերածվել է մոխրակույտի: Բարեբախտաբար տուժածներ չկան: Թե ինչն է եղել առաջացած կրակի պատճառը, պարզվում է: