Բաժանորդագրվեք araratnews-ի տելեգրամ ալիքին։
Ազգային ժողովի «Քաղաքացիական պայմանագիր» խմբակցության քարտուղար Հայկ Կոնջորյանի խոսքով՝ իշխանությունը Հայ առաքելական եկեղեցու հետ որևէ տարաձայնություն չունի, քանի որ որպես հավատավոր մարդիկ Եկեղեցին համարում են իրենց տունը. խոսքը գործող կաթողիկոսի և որոշ սրբազանների վարքագծի հետ հաշտ չլինելու մասին է:
Ըստ նրա՝ վարչապետի հայտարարությունից հետո, այն է՝ որ որոշ եկեղեցիներ «չուլանի» են վերածվել, որոշ հոգևորականներ հոգևորականին ոչ հարիր բառապաշարով և ագրեսիվությամբ մի իսկական «խաչակրաց արշավանք» սկսեցին վարչապետի դեմ և բացահայտեցին ընդդիմադիր ճամբարում հանգրվանած լինելու փաստը:
Կոնջորյանի խոսքով՝ այս մարդիկ չեն զբաղվում հոգևոր ծառայությամբ, այլ դարձել են վեղարով քաղաքական մարտագլխիկներ:
Վերջինս այն համոզման է, որ տասնամյակներով կղերականության որոշ շրջանակի և օլիգարխիայի միջև մի սրբապիղծ ամուսնություն է տեղի ունեցել, և այդ ամուսնության արդյունքում ծնվել է մի այլանդակ համակարգ, որը շահագործել է հայ ժողովրդին ինչպես ֆիզիկական, այնպես էլ հոգևոր մակարդակում:
Այսպես կոչված՝ որոշ հայ հոգևորականներ քաղաքական գողապետերից ստացել են ֆինանսական և այլ արտոնություններ, նրանք էլ օծել են ապալեգիտիմ իշխանությանը և եկեղեցու միջոցով փորձել լեգիտիմացնել Սերժ Սարգսյանի և Ռոբերտ Քոչարյանի իշխանությունը:
Իշխող խմբակցության ղեկավարը նկատում է՝ այսօր կա լեգիտիմ իշխանություն, և Մայր Աթոռի որոշ պետեր տեղները չեն գտնում, որովհետև իրենց ապրանքը այլևս գնորդ չունի, չգիտեն՝ ինչպես սրբությունը վաճառել:
Պատգամավորն ասում է՝ եթե կաթողիկոսը խախտել է բարոյական նկարագրի առանցքային կետերից մեկը, նշանակում է՝ նա կորցրել է հանրությանը բարոյապես առաջնորդելու լեգիտիմությունը: Եթե աղբյուրը պղծվել է, ժողովուրդը չի կարող խմել էդ ջուրը, օրինակ է բերում նա:
Գարեգին Բ-ն չի կարող խուսափել հարցից՝ կուսակրոնության ուխտը խախտե՞լ է, թե՞ ոչ, շեշտում է Կոնջորյանը և հավելում՝ որքան խուսափեն, այնքան ավելի են կորցնելու հոգևոր առաջնորդ լինելու լեգիտիմությունը:
«Պետք է հասկանան, որ եկեղեցին իրենց համար մաֆիոզական խմբավորում չէ, որ գնան «սխոդկա» անեն, որոշեն իրար մեջ: Հոգևորականները պետք է հասկանան, որ իրենց հոր տնից չեն բերել եկեղեցին»,- ընդգծում է օրենսդիր մարմնի ներկայացուցիչը:
Առավել մանրամասն՝ «Հայկական ժամանակ»-ի հետ հարցազրույցում: