Բաժանորդագրվեք araratnews-ի տելեգրամ ալիքին։
Այսօր առավոտյան մեկնելու եմ Մոսկվա, վաղն առավոտյան կհանդիպեմ ՌԴ նախագահ Վլադիմիր Պուտինի հետ. այս մասին Ստամբուլում մամուլի ասուլիսում ասել Իրանի ԱԳ նախարար Աբբաս Արաղչին:
«Ռուսաստանն Իրանի բարեկամն է», - ասել է ԱԳ նախարարը:
Միևնույն ժամանակ նա հայտարարել է, որ այս պահին Թեհրանը չի քննարկում տարածաշրջանում ստեղծված իրավիճակի և ԱՄՆ-ի կողմից միջուկային օբյեկտներին հարված հասցնելու հետ կապված բանակցություններ սկսելու տարբերակը։
«Ես, իհարկե, կապի մեջ եմ Թեհրանի հետ։ Ես դեռևս ճշգրիտ տեղեկություններ չունեմ վնասի մակարդակի մասին, բայց չեմ կարծում, որ դա այժմ կարևոր է։ Միջուկային օբյեկտներին հարվածներն ինքնին միջազգային իրավունքի աններելի խախտում են և պետք է դատապարտվեն։ Այս պահին բանակցություններին նախապատրաստվելու մասին խոսք չկա։ Բայց սկզբունքորեն, դիվանագիտության դուռը պետք է բաց մնա», - ասել է ԱԳ նախարարը Ստամբուլում մամուլի ասուլիսում։
Հիշեցնենք, որ ԱՄՆ նախագահ Դոնալդ Թրամփը հայտարարել է, որ երկրի ռազմաօդային ուժերը հարվածել են Իրանի երեք միջուկային օբյեկտների: Նրա խոսքով՝ ռմբակոծությանը մասնակցած ինքնաթիռներից մեկը «ռումբերի լիքը բեռ» է նետել Ֆորդոյի ուրանի հարստացման գործարանի վրա: Ֆորդոյի հետ մեկտեղ հարվածի են ենթարկվել Նաթանզի և Սպահանի օբյեկտները: Այսպիսով, ԱՄՆ-ն միացել է Իսրայելի կողմից Իրանի դեմ ռազմական գործողությանը:
«Բոլոր ինքնաթիռները անվտանգ վերադառնում են տուն։ Շնորհավորում ենք մեր մեծ ամերիկացի զինվորներին։ Աշխարհում չկա որևէ այլ զինված ուժեր, որը կարող է դա անել», - գրել է նա Truth Social-ում։ Թրամփը հավելել է, որ «հիմա խաղաղության ժամանակն է»։
«Սա պատմական պահ է ԱՄՆ-ի, Իսրայելի և աշխարհի համար. Իրանը հիմա պետք է համաձայնվի ավարտի այա պատերազմը», - գրել է Թրամփը:
Նա հավելել է, որ «ԱՄՆ-ն պատրաստ է կրկին հարված հասցնել, եթե Իրանի հարցը չլուծվի»։
«Կա՛մ խաղաղություն կլինի, կա՛մ Իրանը կբախվի շատ ավելի լուրջ ողբերգության», - նշել է ԱՄՆ նախագահը:
Նրա խոսքով՝ ԱՄՆ-ի դեմ Իրանի ցանկացած պատասխան հանդիպելու է ավելի մեծ ուժի, քան այն ինչ տեղի ունեցավ այսօր: