Բաժանորդագրվեք araratnews-ի տելեգրամ ալիքին։
Քրեական ոստիկանության Արագածոտնի մարզային վարչությունում օպերատիվ տեղեկություն էր ստացվել, որ Ագարակ գյուղի 51-ամյա բնակիչն օգտագործում և իրացնում է թմրամիջոց։ Այս մասին տեղեկացնում են ՆԳՆ ոստիկանությունից։
«Տեղեկությունը ստուգելու նպատակով քրեական ոստիկաններն այցելել են 51-ամյա տղամարդու տուն, որտեղ ակնհայտ տեսանելի հատվածում նկատել են մարիխուանա տեսակի թմրամիջոցին նմանվող զանգված և կաթուցիչ։ Նշված տանն են եղել նաև նույն գյուղի բնակիչներ՝ 39-ամյա և 54-ամյա երկու տղամարդ։ Երեքն էլ ձերբակալվել և տեղափոխվել են մարզային վարչություն։ 39-ամյա տղամարդու անձնական խուզարկությամբ հայտնաբերվել է 5,41 գրամ մարիխուանա և կաթուցիչ, իսկ 54-ամյա տղամարդու անձնական խուզարկությամբ՝ 269 գրամ մարիխուանա և 3 կաթուցիչ, որոնցից երկուսը՝ թմրամիջոցի զանգվածով։
Պարզվել է, որ թմրամիջոցը նրանց իրացրել էր 51-ամյա տղամարդը։
Նախաձեռնվել է քրեական վարույթ, որի շրջանակում կատարված խուզարկությամբ 54-ամյա տղամարդու հողամասում հայտնաբերվել են կանեփ տեսակի բույսեր, իսկ նկուղում՝ 604,18 գրամ մարիխուանա տեսակի թմրամիջոցին նմանվող զանգված։
Թմրամիջոց իրացնելու կասկածանքով ձերբակալված 51-ամյա տղամարդու տան խուզարկությամբ հայտնաբերվել է մարիխուանա տեսակի թմրամիջոցին նմանվող 3,66 գրամ զանգված։ Նա կալանավորվել է։
Կատարվում է նախաքննություն»,– ասվում է հաղորդագրությունում։