SHAMSHYAN.com-ի տեղեկություններով՝  երեկ՝ հոկտեմբերի 27-ին, ոստիկանության քրեական ոստիկանության գլխավոր վարչության թմրամիջոցների ապօրինի շրջանառության պայքարի վարչությունում ստացված օպերատիվ տեղեկություններն իրացնելիս, նույն վարչության  աշխատակիցները,  համագործակցելով ոստիկանության Երևան քաղաքի վարչության քրեական  հետախուզության  բաժնի և ոստիկանության կենտրոնական բաժնի քրեական հետախուզության բաժանմունքի իրենց գործընկերների հետ, Երևան քաղաքի Թումանյան  8 հասցեի մոտ ապօրինի թմրամիջոց ձեռք բերելու, պահելու և իրացնելու կասկածանքով ոստիկանություն են բերման ենթարկել Երևանի բնակիչ, 52-ամյա մի քաղաքացու:  

Վերջինս եղել է Hyundai մակնիշի ավտոմեքենայով և անձնական խուզարկությամբ  նրա մոտ հայտնաբերվել է  1 գրամ  «B8» գրառմամբ  սուբուտեքս տեսակի թմրանյութի  նմանվող  2 դեղահաբ, 2 հատ պոլիէթիլենային տոպրակով փաթեթավորված մոտ  0,66 գրամ սպիտակ մանրացված և մոտ 0,37 գրամ սպիտակ կոշտ «ամֆետամին» տեսակի թմրամիջոցի նմավող զանգված:  

Գ. Շամշյանի  տեղեկություններով՝ 52-ամյա տղամարդը պետական պաշտոնյա է և  աշխատում է ՀՀ  շրջակա միջավայրի  նախարարությունում:  Փաստի առթիվ ոստիկանության կենտրոնական բաժնում հարուցվել է քրեական գործ՝ ՀՀ քր օր-ի 268 հոդվածի 1-ին մասի և 266 հոդվածի 1-ին մասի հատկանիշներով:  

Որպես կասկածյալ պաշտոնյան ձերբակալվել է, իսկ հարուցված քրեական գործը փոխանցվելու է Հայաստանի քննչական կոմիտեի Երևան քաղաքի քննչական վարչության  Կենտրոն և Նորք-Մարաշ վարչական շրջանների քննչական բաժին: 

3321