«Քաղաքացիական պայմանագիր» խմբակցության պատգամավոր Գևորգ Պապոյանը այսօր ԱԺ պետական-իրավական հարցերի մշտական հանձնաժողովի հերթական նիստում «Հայաստան» դաշինքի պատգամավոր Արծվիկ Մինասյանին հարցրեց, թե «Հայաքվե» օրենսդրական նախաձեռնությունը ընդունելու արդյունքում ի՞նչ տեղի կունենա, խաղաղության պայմանագիր կնքելու հավանականությունը կմեծանա՞, թե՞ Ադրբեջանի կողմից ՀՀ-ի հանդեպ նոր պատերազմ սկսելու:
Արծվիկ Մինասյանը արձագանքելով նշեց, որ այն բացարձակ կապ չունի խաղաղության կամ պատերազմի հետ:
«Հիմնական նպատակը այս հարցում միասնականության ներքին համախմբման մեխանիզմի ստեղծման գաղափարն է: Որևէ ձևով սա չեմ կապում այն բանի հետ, որ այս դրույթի առկայությունը Ալիևին կարող է ասել՝ «հելնեմ պատերազմ սկսեմ»: Երկրորդ կարևոր հանգամանքը՝ որևէ իշխանություն պիտի հասկանա, որ սրանք այն արժեքներն են, որոնք բանակցային սեղանի շուրջ չեն կարող լինել: Եթե մենք այսօր ունակ չենք խնդիրը լուծել՝ վերաազատագրել Արցախը, բայց չփակենք Արցախի ժողովրդի այդ իրավունքը՝ պատմական հողում ապրելու»,- ասաց Մինասյանը:
Պապոյանն էլ նկատեց՝ նման նախագծեր ընդունելու դեպքում չի կարող գալ լավ ժամանակ, միանգամից գալու է վատ ժամանակ:
«Չի կարելի ընդունել այնպիսի դոկտրին, որով դու քեզ հայտարարում ես բոլորի թշնամին, բոլորին՝ քո թշնամին: Երբ որ մենք փաստաթղթավորենք, դա ուղղակիորեն փակելու է խաղաղության ճանապարհը, և երկրորդ՝ իրենց տալու է հիմքեր՝ միջազգային հանրությունում հիմնավորելու ՀՀ-ի նկատմամբ հերթական ագրեսիան, որն էլ բերելու է մի շարք հետևանքների»,- ասաց Պապոյանը՝ հավելելով. «Մենք իրավունք ունե՞նք այնպիսի որոշումներ կայացնենք, որոնց արդյունքում մեր երկրի գլխին հերթական փորձանքը բերենք, հերիք չէ այդ էմոցիոնալ որոշումների արդյունքում անընդհատ այդ փորձանքները բերել, մեր ամբողջ պատմության ընթացքում մի տասը, քսան անգամ բերել եք, շարունակե՞նք, թե՞ ինչ-որ մի տեղ կագնենք ու ասենք, որ ռացիոնալ ենք: Այդ ամեն ինչի արդյունքում, ցավոք սրտի, մի հատ բան է տեղի ունեցել՝ մենք մեռել ենք, հայրենազրկվել ենք ու պետություն ենք կորցրել: Հիմա այս փակ շղթայից պիտի դուրս գա՞նք, թե՞ չէ»: