Այսօր՝ ապրիլի 5-ին ժամը 14։00-ին Բրյուսելում կմեկնարկի Նիկոլ Փաշինյանի, ԱՄՆ պետքարտուղար Էնթոնի Բլինքենի և Եվրահանձնաժողովի նախագահ Ուրսուլա ֆոն դեր Լայենի նախատեսված եռակողմ հանդիպումը:

Ինչ սպասել այս հանդիպումից․ սա հարց է, որ գրեթե բոլորին է հուզում։

«Հայկական ժամանակ»-ը հավաքագրել է մի շարք փաստական տվյալներ ու հանդիպման մասին պաշտոնական մեկնաբանություններ, որոնք ստորև ներկայացնում ենք ձեր ուշադրությանը։

• Հայաստանն իր արտաքին քաղաքականությամբ կարողացել է այնպիսի գործոն դառնալ, որ հնարավոր է դարձել այս մակարդակի նախադեպը չունեցող հանդիպումը:
• Սա մեծ գործընթացի՝ Հայաստան-ԵՄ-ԱՄՆ առայժմ բարեկամական հարաբերությունների սկիզբ է, որն իր արդյունքը տալու է ապագայում, հետևաբար պետք չէ շատ մեծ ակնկալիքներ ունենալ այս հանդիպումից անմիջապես հետո:
• Հանդիպման օրակարգում անվտանգության և տարածաշրջւանային հարցեր չկան, այն միայն տնտեսական է։
• Կեղծ են հանդիպման մասին բոլոր նարատիվները, որ տարածվում են ՌԴ-ի և Ադրբեջանի կողմից։ Հանդիպման օրակարգում երբեք չի եղել ռազմական բաղադրիչ:
• Այս հանդիպման մասին ազդարարվել է, ըստ էության, դեռևս անցած տարի Գրանադայում Փաշինյան-Ֆոն դեռ Լայեն բանակցության ժամանակ, իսկ դրան հաջորդած հայտարարության մեջ որևէ բառ չի եղել ռազմական բաղադրիչի մասին:
• Հանդիպումը դիվերսիֆիկացիայի հնարավորություն է ՀՀ տնտեսության համար։
• Վերջին օրերին հակառակորդ ուժերը թեզ են տարածում, թե Բրյուսելում իբր լինելու է ռազմական բաղադրիչ, իսկ հանդիպումից հետո կազդարարեն  իրենց «հաղթանակը», թե իբրև իրենց գործադրած ջանքերի շնորհիվ ռազմական բաղադրիչը դուրս մնաց քննարկումից։
• Ապրիլի հինգը նպատակ չունի հակադրվելու տարածաշրջանին, արդյունքները հստակ դրա մասին կազդարարեն, պետք է չեզոքացնել այս ուղղությամբ տանելու փորձերը: