Բաժանորդագրվեք araratnews-ի  տելեգրամ ալիքին։

2024 թվականի ընթացքում ՀՀ-ում արձանագրվել է հանցագործության 40,232 դեպք, որից 18,397-ը` Երևանում: Նախորդ տարվա համեմատությամբ դեպքերը նվազել են 434-ով կամ 1,1 տոկոսով: Այս մասին ասել  է ՀՀ գլխավոր դատախազ Աննա Վարդապետյանը` ապրիլի 25-ին հրավիրված ԱԺ պետական-իրավական հարցերի մշտական հանձնաժողովի նիստում ներկայացնելով ՀՀ դատախազության 2024 թվականի գործունեության մասին հաղորդումը:

Աննա Վարդապետյանի խոսքով՝ 2023 թվականի համեմատ 2024 թվականին միջին ծանրության հանցագործությունների դեպքերը նվազել են 595-ով կամ 4,6 տոկոսով, ծանր հանցագործությունների դեպքերը` 598-ով կամ 9,8 տոկոսով, իսկ առանձնապես ծանր հանցագործությունների դեպքերն աճել են 422-ով կամ 25,1 տոկոսով:

Հաշվետու ժամանակահատվածում 7,6 տոկոսով աճել են դիտավորությամբ առողջությանը վնաս պատճառելու, 89,5 տոկոսով` մարդկանց թրաֆիքինգի հանցագործությունները, 11,9 տոկոսով` սեռական անձեռնմխելիության դեմ ուղղված հանցագործությունները, 111.4 տոկոսով` թմրամիջոցների մաքսանենգության հանցագործությունները, 9.9 տոկոսով` խարդախության հանցագործությունները և 25.1 տոկոսով` համակարգչային տեխնիկայի միջոցով հափշտակությունները:

2024 թվականին արձանագրվել է ավազակության, կողոպուտի, գողության և մի շարք այլ հանցագործությունների նվազում:

Նշված ժամանակահատվածում 2.2 տոկոսով նվազել են հասարակական անվտանգության, կարգի, բնակչության առողջության դեմ ուղղված հանցագործությունները:

Գլխավոր դատախազը նշել է, որ 2024 թվականին դատարաններում քննվել և ավարտվել է 9830 քրեական գործ` 10.691 անձի վերաբերյալ, որը 93,5 տոկոսով ավելի է 2023 թվականի համեմատ:

ՀՀ գլխավոր դատախազը պատասխանել է նաև պատգամավորների հարցերին:

Հանձնաժողովը ՀՀ դատախազության 2024 թվականի գործունեության մասին հաղորդումն ընդունել է ի գիտություն: