Արևմուտքի և Մոսկվայի հարաբերություններն այսօր, ըստ էության, «Սառը պատերազմ 2»-ում են։ Այսպես է մեկնաբանել երկու կողմերի հարաբերությունները ՄԱԿ-ում Ռուսաստանի Դաշնության ներկայացուցչի առաջին տեղակալ Դմիտրի Պոլյանսկին։
Դիվանագետին խնդրել են հիշել երեսուն տարի առաջ տեղի ունեցած իրադարձությունները և Խորհրդային Միության փլուզումը։
«Այն ժամանակ բոլորը, ես կասեի, հիացած էին Արևմուտքով, բոլորը կարծում էին, որ Արևմուտքում մարդիկ մեր ընկերներն են, որ մեզ ձեռք են մեկնում, որ մենք ապրելու ենք ավելի լավ աշխարհում, և ոչ ոք չի հիշի այլևս Սառը պատերազմը Արևելքի և Արևմուտքի միջև: Բայց շատ շուտով մենք տեսանք, որ մեր գործընկերների մտադրություններն այնքան էլ անմեղ չեն, որքան թվում էր սկզբում»,- ասել է Պոլյանսկին:
«Մենք տեսանք, թե որքան ամերիկացիներ և եվրոպացիներ շահագործեցին մեր երկիրը, փորձեցին ավելի պառակտել Ռուսաստանը, ջախջախել այն, փորձել խթանել անջատողականությունը Ռուսաստանում, առաջացնել տարաձայնություններ Ռուսաստանի և նոր ձևավորվող պետությունների միջև: Սա այլևս գաղտնիք չէ»,- հավելել է նա։
Նա նաև հիշեցրել է այն ժամանակ տրված խոստումները, որ ՆԱՏՕ-ն չի շարժվի դեպի արևելք։ Այսօր, ըստ նրա, Արեւմուտքում կա՛մ ասում են, որ դա չեն ասել, կա՛մ ուղղակիորեն պնդում են, որ խաբել են Մոսկվային, «ինչը նույնպես վստահություն չի ավելացնում Արևելքի ու Արևմուտքի հարաբերություններին»։
«Անկախ Ռուսաստանի առաջին 10 տարիները շատ դժվար էին, խնդրահարույց, և մենք իսկապես կործանման եզրին էինք, տնտեսական վիճակը շատ ծանր էր, բայց հետո, 2000-ականների սկզբին, մենք աստիճանաբար ոտքի կանգնեցինք, վերականգնեցինք մեր ազգային հպարտությունը, որպես անկախ պետություն ապրելու կարողությունը՝ դառնալով Արևմուտքի և ԱՄՆ-ի համար սպառնալիք: Հիմա մենք ունենք սառը պատերազմի մի տեսակ՝ Սառը պատերազմ 2-ի վերամշակմամբ»,- ասել է առաջին տեղակալը։