Այսօր Կառավարության նիստի ժամանակ հավանություն արժանացավ Հայաստանի Հանրապետության Արագածոտնի մարզի Ապարան համայնքի տարածքում «Արագած» ներդրումային ծրագիրն իրականացնելու նպատակով «Ռիդ» սահմանափակ պատասխանատվությամբ ընկերությանը հողամասերն ուղղակի վաճառքի ձևով օտարելուն համաձայնություն տալու մասին հարցը:
Էկոնոմիկայի նախարար Վահան Քերոբյանը մանրամասնեց, որ Ապարան համայնքին առաջարկում են՝ որոշ հողատարածքներ արոտավայրերի կատեգորիայից տեղափոխել խառը բնակավայրերի կառուցապատման կատեգորիայի և օտարել: «Միևնույն է, համայնքն ինքն է որոշելու հողատարածքի վաճառքի վերաբերյալ որոշումը: Մենք գերակա շահի վերաբերյալ որոշում ենք կայացնելու 113 հեկտար տարածքի համար և 3643 հեկտար տարածքի երկարաժամկետ վարձակալության պայմանագրին համաձայնություն ենք տալու, որ Ապարան համայնքը կնքի»,- նշեց նախարարը և ներկայացրեց «Արագած» ներդրումային ծրագիրը:
«Ըստ էության՝ ծրագիրը նշանակում է Արագած լեռան լանջին լեռնադահուկային և էկոգյուղատնտեսական նոր համալիրի ստեղծում, որը վերաբերելու է Վարդենուտ, Արագած, Արայի և Շենավան բնակավայրերին: Նախագծով 4400 հեկտար տարածքի վրա ստեղծվելու է էկոգյուղատնտեսական, կարելի է ասել, նոր գյուղ՝ 300 մինի ֆերմաներով, դրան կից հյուրատներով: Այնտեղ կկառուցվի նաև 3 միլիոն խորանարդ մետր տարողությամբ ջրամբար, որպեսզի գյուղատնտեսական այդ համալիրն ունենա ջրի հասանելիություն: Նաև կառուցվելու է լեռնադահուկային համալիր՝ 5 ճոպանուղիների գծերով, մոտ 30 կիլոմետր սահուղիներով, հյուրանոցներով և այլն: Կառուցվելու է 25 հազար 260 քառակուսի մետր և 104 հազար 920 քառակուսի մետր բակային ճանապարհներ, ավտոկայանտեղիներ, և ընդհանուր ներդրումային ծավալը կազմելու է 190 միլիոն դոլար»:
Նա նաև հշեցրեց, որ ծրագիրը ներկայացվել է քննարկման դեռևս 2018 թվականի նոյեմբերին, և դրա վերաբերյալ 2020 թվականի մարտին կնքվել է փոխըմբռնման հուշագիր, սակայն պատերազմով, քովիդով և այլ մրցակցային ծրագրերի առկայության պատճառով այն ձգձգվել է: Ըստ նախարարի՝ 2021 թվականի օգոստոսին վարչապետի հանձնարարականով ստեղծվել է հանձնաժողով, որը որոշում է կայացրել հավանություն տալ այս նախագծին:
«Շատ կարևոր է ծրագրի սոցիալական նշանակությունը, քանի որ մենք, ըստ էության, ստեղծում ենք օրինակելի համայնք, որը բարձրադիր գոտում տալու է ինքնաբավ և կայուն ապրելու միջավայր, ինչը մեզ համար շատ կարևոր է, որովհետև կլիմայական փոփոխությունները բերում են նրան, որ ցածրադիր գոտիներում ապրելը դժվարանալու է, և գիտենք, որ ՀՀ տարածքի մեծ մասը բարձրադիր գոտիներում է, և կարիք կա այսպիսի մոդելային միջավայրեր ստեղծելու»,- նշեց նա:
Էկոնոմիկայի նախարարի խոսքով՝ ծրագրերի ռիսկերը կառավարելու են՝ խոշոր քառյակի մեջ մտնող աուդիտորական ընկերություններին ներգրավվելով, որոնք պետք է հետևեն դրա ներդրումային փուլին և փուլային հաշվետվություն ներկայացնեն Կառավարությանը ծրագրի կատարման ընթացքի վերաբերյալ. «Նաև տուգանային համակարգ ունենք պարտավորությունները չկատարելու վերաբերյալ: Բացի այդ՝ ընկերությունը կօգտվի մեր ենթակառուցվածքներ ներդրումային ծրագրից, որի շրջանակներում որոշակի ենթակառուցվածքային օժանդակություն ևս կտրամադրենք»:
Քերոբյանը նաև հայտնեց, որ մոտավորապես մեկուկես տարի առաջ Կառավարության հաստատած մեկ այլ դահուկային ծրագիր՝ «Մայլեռը», արդեն սկսել է աշխատել, որը կրկին Ապարան համայնքում է: Այս տարի առաջին դահուկորդները կարողացել են վայելել ծրագրի արդյունքները: Նա մեկ այլ կարևոր կետ էլ առանձնացրեց. «Գիտեք, որ մեծ քննարկում է եղել ֆրանսիական ընկերությունների ներգրավվածության վերաբերյալ: Անցած շաբաթ Ֆրանսիայում հայ-ֆրանսիական բիզնես ֆորումի շրջանակներում հանդիպել եմ այն ֆրանսիական ընկերության հետ, որը որ պետք է լիներ մրցակից ծրագրի օպերատորը, կարելի է ասել՝ համոզել եմ, որպեսզի իրենք դիտարկեն նաև այս ծրագրի օպերատորությունը: Եվ եթե այն հաջողությամբ պսակվի, մենք կունենանք առաջնակարգ օպերատոր նաև լեռնադահուկային համալիրի համար, որը, կարծում եմ, շատ կարևոր է, քանի որ ենթակառուցվածքների և նոր համայնքների զարգացման մեջ մենք հետևում ենք աշխարհի լավագույն օրինակներին»: