Բաժանորդագրվեք araratnews-ի տելեգրամ ալիքին։
Օսլոյում Խաղաղության Նոբելյան մրցանակը շնորհվել է ամերիկյան ատոմային ռմբահարությունից փրկվածների ճապոնական Nihon Hidankyo ասոցիացիային։ Կազմակերպության երեք համանախագահից մեկը՝ Նագասակիում փրկված 92-ամյա Տերումի Տանական, կառավարություններից պահանջոել է «միջոցներ ձեռնարկել՝ հասնելու միջուկային զենքից ազատ աշխարհին», հաղորդում է AFP-ն:
Այդ նպատակին ուղղված ջանքերի համար էլ Տանակային շնորհվել է Խաղաղության մրցանակը:
Nihon Hidankyo-ն կամ Հիրոսիմայի և Նագասակիի ատոմային ռումբի զոհերի ճապոնական խորհուրդը 1956 թվականի օգոստոսից քարոզարշավ է իրականացնում ճապոնական այդ երկու քաղաքների վրա ամերիկյան միջուկային հարվածներից փրկված մարդկանց բժշկական ծառայությունների ընդլայնման, ինչպես նաև միջուկային զենքի մշակումն ու օգտագործումն ամբողջովին արգելելու համար:
Նորվեգիայի Նոբելյան կոմիտեն նշել է, որ ասոցիացիան օգնել է ղեկավարել գլոբալ շարժումը, որն «անխոնջ աշխատում է միջուկային զենքի կիրառման աղետալի հետևանքների մասին իրազեկվածությունը բարձրացնելու ուղղությամբ»: