Զինծառայողների ապահովագրության հիմնադրամը ներկայացրել է հոկտեմբերի 11-ի դրությամբ շահառուների քանակի հաշվետվությունը:

Հիմնադրամից հայտնում են՝ շահառուների թիվը փոփոխվել է. սեպտեմբերի 27-ին թշնամու կողմից սանձազերծված պատերազմի արդյունքում զոհված կամ հաշմանդամություն ձեռք բերած ևս 44 հերոս զինծառայողներ կամ նրանց ընտանիքները հատուցում են ստացել։   

Այսպիսով՝ հիմնադրամի հիմնական շահառուների քանակը 4509-ն է։ Տվյալ թվից 417-ը հիմնադրամի շահառու են դարձել նախքան 2020 թվականի պատերազմը: 

Զինծառայողների ապահովագրության հիմնադրամն ստեղծվել է հայրենիքի սահմանները պաշտպանելիս զոհված, անհայտ բացակայող, զինհաշմանդամության 1-ին և 2-րդ կարգ ձեռք բերած մարտիկների ու նրանց ընտանիքների սոցիալական բարօրության, կայուն և հավասար ապահովագրական հատուցումներ տրամադրելու նպատակով: 

Հիմնադրամի միջոցները գոյանում են Հայաստանում ու Արցախում եկամուտ ստացող անձանց ամսական պարտադիր վճարներից, ինչպես նաև կամավոր նվիրատվություններից, որոնք ստացվում են նաև Սփյուռքից։

216