Ինչպես արդեն հայտնել էինք` Կենտրոնական ընտրական հանձնաժողովը սեպտեմբերի 18-ի արտահերթ նիստում ամփոփել է Երևանի ավագանու ընտրությունների նախնական արդյունքները, ըստ որոնց՝ ավագանու մանդատները կբաշխվեն հետևյալ կերպ՝

«Քաղաքացիական պայմանագիր» -  32.57%՝ 24 մանդատ,

«Ազգային առաջընթաց» - 18.89%՝ 14 մանդատ,

«Մայր Հայաստան» - 15.43%՝ 12 մանդատ,

«Հանրապետություն» - 11.32%՝ 8 մանդատ,

«Հանրային ձայն» - 9.68%` 7 մանդատ։

Քանի որ 50%-ից ավելի ձայն որևէ ուժ չի ստացել՝ Երևանի նոր ձևավորվելիք ավագանին պետք է կոալիցիոն ճանապարհով գնա և քաղաքապետ ընտրի գաղտնի քվեարկությամբ։

Ավագանու խմբակցություններն իրենց թեկնածուների ցուցակի առաջին հորիզոնականում տեղ զբաղեցրած անձին առաջադրում են որպես քաղաքապետի թեկնածու, իսկ եթե վերջինս հրաժարվում է կամ չի համապատասխանում քաղաքապետին առաջադրվող պահանջներին, ապա խմբակցությունը կարող է առաջադրել տվյալ կուսակցության թեկնածուների ցուցակի համապատասխանաբար հաջորդ այն անձին, որը համաձայն է առաջադրվել որպես թեկնածու և համապատասխանում է քաղաքապետին առաջադրվող պահանջներին:

Նշենք, որ «Երևան քաղաքում տեղական ինքնակառավարման մասին» օրենքի 44-րդ հոդվածը սահմանում է հետևյալը՝

«Եթե առաջադրվել է մեկից ավելի թեկնածու, ապա քաղաքապետ է ընտրվում այն թեկնածուն, որը ստանում է ավագանու անդամների ընդհանուր թվի ձայների մեծամասնությունը: Եթե առաջադրված թեկնածուներից որևէ մեկը չի ստանում ավագանու անդամների ընդհանուր թվի ձայների մեծամասնությունը, ապա առավելագույն ձայներ ստացած երկու թեկնածուների միջև անցկացվում է քվեարկության երկրորդ փուլ: Եթե հավասար ձայների պատճառով հնարավոր չէ պարզել առավելագույն ձայներ ստացած երկու թեկնածուներին, ապա երկրորդ փուլին մասնակցում են նաև հավասար ձայներ ստացած մյուս թեկնածուները:

Երկրորդ փուլում քաղաքապետ է ընտրվում առավելագույն ձայներ ստացած թեկնածուն: Ձայների հավասարության դեպքում անցկացվում է լրացուցիչ քվեարկություն` քվեաթերթիկում ընդգրկելով միայն հավասար ձայներ ստացած անձանց: Լրացուցիչ քվեարկության արդյունքով ձայների հավասարության դեպքում առավելությունը տրվում է տարիքով ավագին»:

Հոդվածը սահմանում է, որ քվեարկության երկրորդ փուլն ու լրացուցիչ քվեարկությունն անցկացվում են անմիջապես հիմնական քվեարկության արդյունքները հրապարակելուց հետո:

Իսկ եթե առաջադրվել է մեկ թեկնածու, ապա վերջինս ընտրվում է քաղաքապետ, եթե նրա օգտին կողմ քվեարկած ձայները ավելի են դեմ քվեարկած ձայների թվից և ավելի են ավագանու անդամների ընդհանուր թվի 40 տոկոսից։

Հիշեցնենք, որ տարբեր քրեական գործերով մեղադրյալ Վարդան Ղուկասյանի «Հանրային ձայն»-ը Հայկ Մարությանին և Ռոբերտ Քոչարյանի խմբակցության նախկին պատգամավոր Անդրանիկ Թևանյանին առաջարկել է միավորվել՝ ընտրել քաղաքապետ և Երևանում տապալել գործող իշխանությանը։ Սակայն մինչ այս պահը ո՛չ Մարությանը, ո՛չ էլ Թեւանյանը չեն արձագանքել այս առաջարկին, թեպետ Մարությանը դեռ քարոզարշավի ընթացքում բացառել էր ներկա կամ նախկին իշխանության հետ համագործակցությունը։