Մադրիդի «Ռեալի» նորեկ Կիլիան Մբապեի շնորհանդեսը «Սանտիագո Բեռնաբեու» ստադիոնում տեղի կունենա հուլիսի 16-ին, տեղեկացնում է ակումբի պաշտոնական կայքը:

Շնորհանդեսից հետո կկայանա ֆրանսիացի հարձակվողի մամուլի ասուլիսը: Ավելի վաղ հայտնի էր դարձել, որ Ֆրանսիայի հավաքականի ավագը «Ռեալում» հանդես է գալու «9» համարի մարզաշապիկով:

Մբապեն այս ամռանն ազատ գործակալի կարգավիճակում էր հեռացել ֆրանսիական ՊՍԺ-ից ու տեղափոխվել «Ռեալ»: Կողմերի միջև կնքված պայմանագրի ժամկետն ուժի մեջ է մինչև 2029 թվականի հունիսի 30-ը:

Լիգա 1-ի ավարտված մրցաշրջանում Մբապեն 29 խաղում խփել է 27 գոլ ու կատարել 7 գոլային փոխանցում: Նա ՊՍԺ-ի պատմության լավագույն ռմբարկուն է։

Գերմանիայում ընթացող Եվրո-2024-ում ֆրանսիացին 5 խաղում դարձավ 1 գոլի և 2 գոլային փոխանցման հեղինակ։