AraratNews.am-ը շարունակում է ուսանողների հետ հարցազրույցների շարքը, որի նպատակը կրթության ոլորտում առկա բացերի, ուսանողական կյանքի առանձնահատկությունների, ուսումնական գործընթացի առավելությունների ու թերությունների վերհանումն է:

AraratNews.am-ի թղթակցի զրուցակիցը Երևանի պետական համալսարանի (ԵՊՀ) միջազգային հարաբերությունների ֆակուլտետի միջազգային հարաբերությունների բաժնի շրջանավարտ (բակալավր), ԵՊՀ միջազգային հարաբերությունների ֆակուլտետի Քաղաքական գիտության պատմության և տեսության ամբիոնի «Ազգային անվտանգություն» կրթական ծրագրի մագիստրոս Գարիկ Հարությունյանն է:

Գարիկ, տարիներ առաջ ԵՊՀ միջազգային հարաբերությունների ֆակուլտետի համանուն բաժինը համարվում էր «ամենապրեստիժային» ֆակուլտետը: Դիմորդների մի մասն անգամ չգիտեր, թե հետագայում որ ոլորտներում կարող է աշխատել: Ի՞նչ եք կարծում, այսօր այդ առումով «դրական տեղաշարժեր» կա՞ն:

Գիտեք, տարիներ առաջ, երբ դեռ դպրոցական էի, կար այն տարածված տեսակետը, թե միջազգային հարաբերություններ, իրավագիտություն ֆակուլտետները ամենապրեստիժայինն են: Սակայն ես ընդունվեցի տվյալ ֆակուլտետը ոչ թե պրեստիժի, այլ գիտելիքի համար, և կարող եմ ասել, որ ընտրություն կատարելու հարցում չեմ սխալվել: Ոլորտը բավական լայն է՝ ԱԳՆ, ԿԳՆ, պետական հիմնարկներ, միջազգային կազմակերպություններ,  կախված է նրանից, թե դու քեզ որ ասպարեզում ես պատկերացնում:

Կանխավ ուզում եմ երախտագիտությունս հայտնել  «Դիվանագետի գրադարան» առցանց հարթակը ստեղծելու համար: Ես և իմ սերնդակիցները, թերևս, շատ լուրջ խնդիրներ ենք ունեցել մասնագիտական գրականության հետ կապված: Վստահորեն կարող եմ ասել, որ շատ մեծ գործ եք կատարել: Ինչպե՞ս առաջացավ գաղափարը: Ովքե՞ր Ձեզ այդ հարցում օժանդակեցին:

Հարթակը ստեղծել եմ անցած տարվա վերջին՝ դեկտեմբերի սկզբին: Պետք է նշեմ, որ կայքը պարբերաբար թարմացվում է, այդտեղ առկա են բակալավրիատի, մագիստրատուրայի շրջանակներում դասավանդվող բոլոր առարկաներին առնչվող գրքերը, թարգմանված նյութեր, առցանց հղումներ, pdf տարբերակով ներբեռնված մի շարք գրքեր: Բացի այդ, կայքում կան նաև մի շարք մասնագիտական բաժիններ, որոնք օգտակար կլինեն ոչ միայն ուսանողներին, այլև ոլորտով հետաքրքրվողներին: Կայքը ստեղծել եմ իմ ուժերով, որևէ մեկի կողմից օժանդակություն չեմ ստացել, և կշարունակեմ ազատ ժամանակ թարմացնել՝ այդպիով հարստացնելով գրադարանում առկա բաժինների թիվը:

«Դիվանագետի գրադարան» առցանց հարթակում հայալեզու գրականությունից զատ, միայն օտար լեզվով մասնագիտական գրականությունից թարգմանություններ ներառվա՞ծ են:

Կայքում բոլոր բաժիններում տեքստային ոճով հայերեն լեզվով են շարադրված նյութերը, սակայն պետք է նշեմ, որ google drive-ի միջոցով կան pdf տարբերակով անգլերեն, ռուսերեն լեզուներով ներբեռնված գրքեր: Դա նրանց համար է, ովքեր ցանկանում են տվյալ բաժնի վերաբերյալ հավելյալ տեղեկատվություն ստանալ: Օրինակ՝ կայքում կա բաժին, որը նվիրված է Մերձավոր Արևելքին: Տվյալ բաժնում առկա են մի շարք թեմաների հայերեն թարգմանություններ, բացի դրանից՝ անգլերեն, ռուսերեն լեզուներով բազմաթիվ գրքեր, հոդվածներ:

Գարիկ, ԵՊՀ միջազգային հարաբերությունների ֆակուլտետի համանուն բաժնում ո՞րն է եղել Ձեր երկրորդ մասնագիտական օտար լեզուն: Այդ լեզվին ներկայումս որքանո՞վ եք տիրապետում:

Իմ երկրորդ լեզուն եղել է ճապոներենը, որը բավական բարդ լեզու է: Ներկայումս տիրապետում եմ տվյալ լեզվին՝ մինչև 4-րդ մակարդակ:

Ո՞րն է եղել Ձեր դիպլոմային աշխատանքի թեման: Աշխատանքն ավարտելիս ի՞նչ առաջնահերթ եզրահանգումների եք եկել:

Իմ ավարտական աշխատանքի թեման եղել է «Անվտանգության քաղաքականության տեսագործնական հիմնախնդիրները սահմանադրական բարեփոխումների համատեքստում», որի շրջանակներում անդրադարձել եմ ազգային անվտանգության շուրջ գիտական բնորոշումներին, ՀՀ ազգային անվտանգության համատեքստում պետական կառավարման ձևի հիմնախնդիրներին:

Ո՞ր գերատեսչություններում եք անցել Ձեր մասնագիտական պրակտիկան:

Արտադրական պրակտիկան անցել եմ ԿԳՆ-ում՝ Բարձրագույն և հետբուհական մասնագիտական կրթության վարչությունում:

Որպես ԵՊՀ միջազգային հարաբերությունների ֆակուլտետի քաղաքագիտության բաժնի շրջանավարտ, շատ լավ ծանոթ եմ ֆակուլտետում գործող երկրորդ հեթի հետ կապված խնդրին (մեզ բախտ վիճակվեց 4 տարի շարունակ երկրորդ հերթով սովորել):Ի՞նչ եք կարծում. երկրորդ հերթը կարո՞ղ է ազդել ուսանողի առաջադիմության վրա:

Պետք է նշեմ, որ բակալավրիատում սովորելու տարիներին 4 տարի ինձ բախտ է վիճակվել սովորել առաջին հերթով: Ճիշտ եք, երկրորդ հերթը ազդում է ուսանողի վրա, նաև այն առումով, որ ուսանողը աշխատում է, իսկ երկրորդ հերթը քեզնից ժամանակ շատ է խլում: Կարծում եմ՝ հետագայում լսարանների քանակը համալրելուց հետո բոլորը կլինեն առաջին հերթով, որը ձեռնտու կլինի համալսարանում սովորող բոլոր ուսանողներին:

Ինչու՞ մագիստրոսական ծրագրերից նախապատվությունը հենց Քաղաքական գիտության պատմության և տեսության ամբիոնի «Ազգային անվտանգություն» կրթական ծրագրին տվեցիք:

Բակալավրիատում սովորելու տարիներին անվտանգության վերաբերյալ գրեթե ոչինչ չի խոսվել, որևէ առարկա չենք անցել, որը կառնչվեր անվտանգությանը, այդ իսկ պատճառով որոշեցի դիմել քաղաքագիտության բաժնի ազգային անվտանգություն մագիստրոսական ծրագրիրը, և այն պարզ պատճառով, որ մագիստարտուրան համարվում է երկրորդ մասնագիտություն:

Գարիկ, միշտ վիճարկվել  է այս հարցը. Ձեր դիտարկմամբ` միջազգային հարաբերություննե՞րն են քաղաքագիտություն գիտակարգի մի մասը կազմում, թե՞ հակառակը:

Գիտեք, կան մի շարք երկրներ, որտեղ գործում են քաղաքագիտության ֆակուլտետներ, և միջազգային հարաբերությունները հանդիսանում է տվյալ ֆակուլտետի բաժին, մինչդեռ Հայաստանում լրիվ հակառակն է: Ես երկու ոլորտներն էլ կարևորում եմ: Քաղաքագիտությունը հասարակության քաղաքական բնագավառն է, նրանում տեղի ունեցող բոլոր գործընթացները և երևույթները:

Ի՞նչ առաջնահերթ խորհուրդներ կտաք ապագա քաղաքագետներին ու միջազգայնագետներին:

Ապագա քաղաքագետներին, միջազգայնագետներին խորհուրդ կտայի առաջին հերթին չսովորել զուտ գնահատականի կամ դիպլոմի համար, այլ առաջնահերթությունը տալ գիտելիքին, քանի որ հետագայում դառնալով մասնագետ՝ կիրառելու եք ձեր սովորած գիտելիքները: Բացի համալսարանական կրթությունից աշխատեք զբաղվել նաև ինքնակրթությամբ՝ կարդացեք մասնագիտական գրքեր, ազատ ժամանակ ընթերցեք տարբեր հոդվածներ, հետևեք ամենօրյա իրադարձություններին՝ փորձելով վերլուծել աշխարհում ընթացող ներկայիս իրավիճակը:

Օլյա Շահինյան