Իսրայելում հերթական զանգվածային բողոքի ակցիան է տեղի ունեցել Բենիամին Նեթանյահուի նախարարների կաբինետի առաջարկած դատաիրավական բարեփոխումների նախագծի դեմ։ Հանրահավաքներ են կազմակերպվել երկրի ավելի քան 50 վայրերում։
Կազմակերպիչները նշում են, որ Թել Ավիվում ցույցին միացել է 135 հազար մարդ:
Երկուշաբթի օրը Քնեսեթը (Իսրայելի խորհրդարանը) կսկսի դատաիրավական բարեփոխումների մասին օրինագծի առաջին մասի քննարկումը։ Ընդդիմությունը խոստանում է այդ օրը նոր լայնամասշտաբ ցույց անցկացնել։
Փաստաթղթի քննադատները խոսում են ժողովրդավարությանը սպառնացող վտանգի մասին. նախագիծը նախատեսում է օրենսդիրների կողմից դատարանների որոշումները բեկանելու հնարավորություն։
Փաստաբան Նաթի Ռոնը բացատրում է, թե ինչու է եկել բողոքի ակցիայի. «Մենք այլընտրանք չունենք, մենք չենք կարող հանձնվել: Սա մեր երկիրն է, ես կռվել եմ, ընկերներ եմ կորցրել այս պատերազմներում, նրանք չեն զոհվել դրա համար, ոչ թե հանուն բռնապետական պետությունների: Ես նրանց պարտքերի տակ եմ, ամենաքիչը, որ կարող եմ անել»: «Հույս ունեմ, այստեղ շատ մարդ է հավաքվել, բայց կառավարությունը դեռ չի ուզում լսել մեր ձայնը»,- ասաց հանրահավաքի մասնակից, իրավաբանի ուսանող Ամիտ Մելամեդը։
Բարեփոխումների կողմնակիցներն ասում են, որ երկրի իրավական ինստիտուտները չափից դուրս քաղաքականացված են, և փոփոխությունները կարող են վերականգնել հավասարակշռությունը:
Հունվարի սկզբից Իսրայելում ամենշաբաթյա զանգվածային ցույցեր են տեղի ունենում դատական բարեփոխումների դեմ։ Նոր կառավարության առաջարկած նախագիծը, մասնավորապես, ենթադրում է Գերագույն դատարանի լիազորությունների սահմանափակում և նախարարների կաբինետին դատավորների ընտրության նկատմամբ վերահսկողություն տրամադրելը։